Shillong, Nailar, 11: Ka Hynñiewtrep Youths Council (HYC)-Central Executive Council (CEC) mynta ka sngi ka la dawa na ka Sorkar Jylla ba dei ban pynsangeh shwa ka jingthungkam 13 ngut ki Child Development Project Officers (CDPO).
Dang shen ka Kynhun Myntri jong ka Sorkar Jylla ka la mynjur ban thungkam lyngba ka Contractual Basis ia ki 13 ngut ki briew kum ki Child Development Project Officers (CDPO).
Haba iakren bad u nongthoh khubor hadien ka jingiakynduh ia u Myntri ka tnat Social Welfare u Ma Kyrmen Shylla, u General Secretary ka HYC-CEC u Bah Roy Kupar Synrem u la ong, ba ka Sorkar ka dei ban pynsangeh shwa ia ka jingthungkam CDPO namar kumba ka long mynta ka tnat Social Welfare kam pat don satia ka Service Rules na ka bynta ki Lady Supervisor bad ka jingpynkiewkam ia ki sha ka kyrdan CDPO ka Sorkar kam shym la ai satia.
Ka Sorkar Jylla ka dei ban thaw shwa ia ka Service Rules na ka bynta ki Lady Supervisor bad ia ki Anganwadi bad ym tang katta ka tnat Social Welfare ka dei ruh ban bud ia ki kyndon ba la ai da ka Sorkar Pdeng bad ia ka skhim ICDS,” ong shuh shuh une u nongialam ka HYC.
Haba kylli, u Bah Roy Kupar Synrem u la iathuh ba katkum ka jubab RTI ba ka Seng ka la ioh na ka ophis jong ka tnat Social Welfare, la pyntip ba ki don 222 ngut ki Lady Supervisor ba la pyntreikam ha ki ICDS bad ki hap ban khmih ia ki 5600 tylli ki Anganwadi Centre katba kawei ka Lady Supervisor kan hap ban peit marwei la kumno kumno 20-25 tylli ki Anganwadi Centre.
ka seng HYC kala buh ka jingkylli ia ka tnat Social Welfare, hato kane ka ki Lady Supervisor ki lah neem ban kiew kam bda ka jubab kaba ngi ioh ka long ba ym donlad ia ki ban kiew kam.
Hynrei kaba lyngngoh ka long katkum ka jingpynbna jong ka Sorkar Pdeng ha u snem 1986 la bthah ia ki Sorkar Jylla ba kin shna ia ki Rules na ka bynta ban thungkam ha ka post Supervisor bad CDPO. Katkum kane ka jingbthah kine ki Lady Supervisor ki don ruh ia ka hok ban ioh kiew sha ka kyrdan CDPO haba don ka jinglait post,” ong u Bah Synrem.
Hynrei kaba lyngngoh pat ka long ha kane ka Jylla jong ngi naduh u snem 1986 haduh une u snem 2020 ka tnat Social Welfare kam pat don ia ka Service Rules, kaba mut, ba la shu pynduh ia ka hok jong ki Lady Supervisor ban kiew kyrdan CDPO,” la bynrap u Bah Roy.
ka seng HYC kala buh jingkylli ia u Bah Kyrmen Shylla, hato ki Lady Supervisor ki lah neem ban kiew kyrdan, ka jubab ka long haoid namarba ka don ka jingbthah jong ka Sorkar Pdeng ha u snem 2015. Hynrei lada kine ki 222 ngut kim lah ban kiew kam ia mynta, kita ki Anganwadi Workers pat kin kiew kyrdan haei,” la iathuh u Bah Synrem.a
La ong ba lada kine ki 222 tylli ki Post ki la dap lypa, ka mut ba ki Post kim don hi ruh bad ka jingkam ba ki Anganwadi ki lah ban kiew kyrdan kum ki Lady Supervisor kam long kaba shongnia namarba kumba ka long mynta kim don satia haduh 222 tylli ki post bad ki Lady Supervisor ruh kim shym la kiew kyrdan CDPO,” la bynrap shuh shuh une u General Secretary ka HYC.
