Shillong, Nailar 20: Ka HYC Mawlai circle mynta ka miet 20/8/2020 kala bat ia ki lai ngut ki bar Jylla na Assam kiba wan rung beain bad uwei u draibat ba dei u khasi jong kawei ka trok NLO1 K 1866 khlem ki kot ki sla kiba biang kum ka permission na ki bor District.
Ka HYC ka kynnoh ba kane ka pyni ia ka jingbymler ka COVID check point jong ka sorkar kaba don ha Byrnihat bad Mawiong view point. Kitei ki bar Jylla ki kyrteng Abdul Mukalam, Nur Alom, Sanjit Ray.
Na ka liang jong ka HYC kala kynnoh, Katba Ki dkhot jong ka seng ki dang ring videos ka la don ka jingia pyni bor bad ki pulit, namar ki la knieh ia ki mobile bad ki la delete ia ki dur.
Hadien ba la ia pyni nia la kham slem, ki bor pulit kiba la thmu nyngkong ban pyllait suk ia kitei ki briew na Assam, ki la pynjem noh lyngba ka jingdawa jong ka seng ba dei ban rah noh mynta shapoh Polo COVID centre ban leh ia ka jingtest COVID, bad ban phah shong quarantine.
U Bah Donboklang Kharlyngdoh President HYC Mawlai circle haba ai jingkren u la ong, kan myntoi aiu ka Notification jong ka SOP kaba la pynbna da ka sorkar lyngba u Principal secretary ka tnad Labour, lada ia ki nongbylla bar Jylla yn pdiang laitluid da kaba iaid lait ia kitei ki kyndon.
U la Ong lada ia ki driver khasi kiba iaid da u even number ha ka sngi Jong u odd number phi kuna da ka pisa, balei ia kine ki bar Jylla khamtam kiba wan na kawei ka state. Hato don ei ei ha lyndet jong ka COVID 19 check point, ne ioh ka la kylla long ka khyrdop khrong khajna haba kumta ?.
Ka seng ka kren Shai ba kumba ka la mih shakhmat ban ia tynrong lem ia ka jingkit bakhia jong ka Jaidbynriew ha kaba iadei bad ka jingiakhun ia kane ka Khlam COVID 19, mynta ruh ka kren Shai sha ka sorkar ba lada phim lah ban buh ia ki briew kiba biang hapoh kitei ki check point, ka seng ka long ba la kloi ban buh volunteer hi noh.
Dei tad haduh ka jingwan shimti ki kali na ophis DC ki dkhot jong ka seng ki sa iapra noh na katei ka jaka Mawiong COVID check point ha ka por 12.45 mynstep ka 21/8/2020.
Kane ka long katkum ka kyrwoh ba la phah da u organising secretary HYC Mawlai circle Shanbor Marwein.
