Shillong, Naitung 05: Ka AJYWO Central Body, ka dawa na ka sorkar jylla ba mynta hapoh ka jingialam u Conrad K Sangma, Chief Minister ban ai C&RD Block thymmai noh kloi kawei ha ki thaiñ Lumshnong bad ruh ban pynneh ia ka Wapung C&RD Block ha Wapung hi kat kum ba la plie maw nongrim ia ka ha ka 22 tarik, Iaiong, 2017.
“Ka jingleh jong ka sorkar MUA-II ba da ka ba pynkynriah noh ia ka Wapung C&RD Block na Wapung tang hadien 8 bnai ba la plie ia ka, ka la wanrah ia ka jingkthang bad ka jingpait-iapra hapdeng ki paidbah kiba hap hapoh jong katei ka block” ong u Bah M H Dkhar President, AJYWO Central Body.
U Bah Dkhar, u la ong ruh, “Ka long kaba lyngngoh ban iohi ba ka jingpynkynriah iaka C&RD Block na Khliehriat sha Wapung ka shim por 4 snem kynthih katba haba pynkynriah pat ia katei ka block na Wapung sha ki thaiñ Lumshnong ka shimpor imat tang ha ka shi kyllipmat”.
U tei u nongialam jong ka AJYWO u la bynrap biang,“Ngi iaroh iaka jingsted trei kam jong ka Sorkar MUA-II ba mynshuwa ha ka jingiadei bad ka jingpynkynriah ia ka Wapung C & RD Block sha ki thaiñ Lumshnong tang ha ki khyndiat por. Jin lada ka sorkar kan leh kumne beit ha kaba wanrah ia ka roi ka par ha ka jylla, ka jylla jong ngi, kan ym sahdien shuh da lei lei ruh em.
Hynrei ngim lah pat ban pdiang ia kane ka polisi trei kam jong katei ka sorkar ba mynshuwa ha ka jingiadei bad katei ka block namar ka long kum ba khroh sweet meat ia ki khynnah, nalor kaba phah pynlud kai ia ka pisa u paidbah bad jong ka Dorbarshong Wapungskur ha ka jingiadei bad katei ka block kaba neh tang 8 bnai hadien nato pat de sa khroh sweet meat ia ki paidbah ba shathie jong ka East Jaintia Hills da katei ka juh ka block.
Kane kam iapher satia na ka polisi trei kam thurmur jong u Muhammad Bin Tuglak. Mano ban shitom dei ki paidbah bad ki briew sorkar kiba dei peit bad pyntrei kam ia kiba kum kita ki polisi treikam thurmur jogn ka sorkar.”
“Mynta tang na ka daw jong ka jingleh kai jong katei ka sorkar ba mynshuwa ia ki paidbah jong ka Wapung C&RD Block, ki paidbah, nalor ka jinglut phut ba la pynlut lupa mynhuwa namar katei ka block naduh ka pisa sorkar haduh ka pisa jong ka Dorbar Shnong, ki la hap ban ia pynlut pisa ban ia kiew sa sha iinglieh-iingsaw bad mynta wan sa ka Public Hearing bad hadien nangne ngim tip shuh sa kaei ba ka sorkar kan dang pynkulmar jingmut bad pynjynar ia u paidbah jong ka thaiñ tang namar katei ka block,” la ong shuh shuh u bah Dkhar.
Ha u kyrowoh u Bah Dkhar, u la ong ruh, “Ngi iohi bad sngewthuh ia ka jingeh ki paidbah ka East Jaintia Hills kiba sah ha ki bynta ba shathie jong ka District. Ka kamram jong ka sorkar lada ka sngewthuh bad iohi ia kane, ka la dei ban ai noh kloi da kawei pat ka block ba thymmai ia katei ka thaiñ ym ban rah noh kumne tang hadien 8 bnai ia kaba la dep plie bad kular ia ki paidbah ba hap hapoh ka thaiñ Wapung kata ruh da ka ba buh artylli ki block tang ha kawei ka L.A Constituency,”
“Namar kata, ka AJYWO ka dawa na kane ka sorkar ba mynta ba kan pynbha noh ia katei ka jingleh thurmur jong katei ka sorkar ba lah dep, da kaba ai noh wut da ka block thymmai ha ki thaiñ Lumshong. Ka por ka ka la ih bha ba katei ka thaiñ ruh kan ioh noh kawei ka block. Ngi dawa ruh na ka sorkar ba mynta ba kan maramot bad sop-spaiñ bad Pynbha noh ia ka jingmong jong baroh arliang ki paidbah ki ba hap hapoh hapoh ka jingkdup jong ka Wapung C&RD Block, khnang ban ioh ka jingshaniah bad jingiaroh na u paidbah lym kumta, ki paidbah kin sa duh jingshaniah ia ka sorkar.
Ki paidbah baroh ki peit mynta sha kane ka sorkar ba la ialam u Conrad K Sangma kum u Chief Minister ba kan dei ka sorkar ka ban ai ia ka jingshakri kaba bha tam ia u paidbah ha baroh ki liang, hynrei lada kane ka sorkar kan bakla shim rai ia kane, ki paidbah jong ka thaiñ naduh mynta kin sa duh jingshaniah ia ka sorkar”, kren pynkut u Bah M H Dkhar.
