Shillong, Jymmang 28: U kyrtong MP jong ka UDP u Dr Jemino Mawthoh u la ong ba ka daw bah jong ka jinghshah rem ka jong u ha kane ka ilekshon kaba dang shu dep, ka daw bah ka dei na ka CAB nalor kiwei kiwei ki daw, ia kane u la kren sha ki lad pathai khubor mynta ka sngi ha Shillong Press Club.
Haba kren ha ki lad pathai khubor u Dr Mawthoh u la ong ba u pynpaw ia ka jingsngewnguh kaba khraw ia baroh ki nongialam seng sain pyrthei kiba dei na ka UDP, NPP, PDF, HSPDP bad kum juh ia u kyrtong shimet nas Nongkrem u Bah Lambor Malangniang kiba la ia trei shitom na ka bynta jong u.
Halor ka jingkynnoh ba kam shym don kata ka jingtrei shitom na ki party kiba ia don lang ha ka sorkar MDA, u Dr Mawthoh u la kyntait ia kane ka jingkynnoh bad u la ong ba baroh kila ia trei lang kum ki nongialam, ia ki jingiapher hangne hangtai ka dei tang ha ki jaka hynrei ym kum ki party kiba ia don lang ha ka sorkar MDA.
U Dr Mawthoh, u la ong ba ka daw bah jong ka jngshah rem ka dei na ka CAB, ia kata ym lah ban leh, hynrei halor ka jingkynthoh ban ong ba ka UDP kam lah shuh, kam don ei ei kaba kumta, hynrei u la kam kylla ba dei ka Congress kaba la hiar bad u la kam ba kin sa don ki MLA Congress ban rung sha ka UDP.
Ka Congress ha Delhi kam don bor shuh, ka paw na kane ka ilekshon ba la don kam ban pynkhlain ia ki seng trai ri bad ha kane ka juk thaw sorkar khleh khawlong, ym lah ban lait. Tang namar ba ki don ki MLA ka BJP ha kane ka sorkar MDA kam mut ba ka UDP ka kyrshan ia ka rukom pyrkhat ka BJP kane ka long kaba bakla.
La ong ba wat la u shah rem ha kane ka ilekshon hynrei ka jingioh bote kala kiew ban ia ka Congress la da shim ha kane ka MLA 2018 bad ka MDC 2019. Ka jingioh bote jong ki seng riewlum kala kiew ha kane ka MP ilekshon kaba mynta. Ha kane ka MP ilekshon ba dang shu kut u kyrtong ka Congress u la ioh 4,18,689 bote bad jong ka UDP u la ioh 2,67,433 bote bad kane kala kiew sha ka 34.35% ka bote jong ki seng riewlum.
