Shillong, Jymmang 11: Mynta ka sngi ka seng HANM kala leit ban ai ia ka dorkhas sha u myntri rangbah ka jylla u Conrad K Sangma, Symbut Myntri Rangbah ka jylla u bah Prestone Tynsong bad ha u myntri kam poh iing u bah Lahkmen Rymbui, kane ka dorkas ka long ban dawa ba ka sorkar Meghalaya ka dei ban pynkylla noh ia ka jingpynbna ka sorkar Assam ba la rah ia ka Block I bad Block II sha Mikir ha u snem 1951.
Ha kane ka dorkhas kaba ka HANM kala thoh ka long ba shuwa ka snem 1951, ba ia ka United Khasi bad Janintia Hills District la buh ha ki ar tylli ki Civil Subdivision bad Jowai Subdivision, ka Block II ka dei hapoh jong ka raid Nongtung kaba hap hapoh jong ka Nartiang Doloiship namar ia ka khajna khydnew la siew sha u Doloi ka Nartiang.
Dei ha u snem 1951 la pynmoh ia ka United Mikir bad North Cachar Hills ban shna ia ka Block I bad Block II bad ia kine ki jaka la shim na ka Jowai Civil Subdivision ban thep sha Mikir lyngba ka jingpynbna No. TAD/R/31/50/ 149 ka 13th Iaiong 1951 da u lat jong ka jylla na ka bynta ka jingbit jngbiang ha ka pyniaid kam pyniaid jam.
Dei ha u snem 1952 la thaw ia ka United Khasi bad Jaintia Hills Autonomous District Council hynrei ia ka Block I bad Block II ym shym la wanrah sha ka Untied Khasi bad Jaintia Hills Autonomous District Council, dei ha u snem 1969 ba ioh ia ka jylla bym pura bad ha u snem 1972 la ioh ia ka jylla ba pura halor ki ar tylli ki District, ka United Khasi bad Jaintia Hills District lait noh ka Block I bad Block II bad ka Garo Hills District.
Dei halor katei ka nongrim ba ka seng ka dawa na ka sorkar Meghalaya ba kan pyndon noh ia ka jignpynbna No. TAD/R/31/50/ 149 ka 13th Iaiong 1951 jong u Lat ka jylla Assam ha katei ka por khnang ban wanrah noh ia kitei ki jaka sha Meghalaya, ia kane ka dorkhas la soi da u president ka seng u bah Lamphrang Kharbani.
