Shillong, Jymmang 04: Mynta ka sngi u Secretary jong ka shnat rung kam hapoh ka tad pulit u la ai ka ejahar halor ka jingsaphriang jong ka jingkhot rung kam kaba shuthok hapoh jong ka tnad pulit. Na ka liang jong ka “Central Recruitment Board” jong ka tnad pulit kala pynshai ba kane kam dei kaba la pynmih da katei ka ophis.
Na ka liang jong ka CRB kala pynshai paidbah ba ka jingpynbna kaba la mih ha kine ki sngi ha ki lad khubor ka long kaba bakla bad ka bym shisha. La kyntu ia ki paidbah ba kim dei ban ngop ha kum kine ki jingpynbna kiba long beain, ki paidbah ki dei ban da peit bha wat juh ngop klumar.
Na ka liang jong ka CRB kala kren shai kdar ba lada don kano kano ka jingpynbna ba kan don ka jinglaitkam ha ka tnad pulit, ki pynbna ha ka website jong ki pulit, www.megpolice.gov.in . Kino kino ki jingpynbna ki bym don hapoh ka website jong ka tnad pulit long kiba shuthok. Na ka liang jong ki pulit kila pynlong ia ka jingtohkit ban kem ia ki briew kiba leh ia kane kam shukor.
