Shillong, Jymmang 26: Ka Miani D Shira ka kyrtong jong ka seng Congress kaba ia khun ia kane ka elekshon shiteng samoi na 53-Ampati Constituency mynta ka sngi kala ai ia ka ejahar hapoh jong ka Ampati Police Station pyrshah ia u myntri kam poh iing ka jylla u James K Sangma bad ia ka MLA jong ka South Tura MLA ka Agatha Sangma halor ka jingkynnoh ba kila pynkhien ia ki kyndon pyniaid elekshon.
Ha kane ka jingujor sha ki pulit ka kyrtong jong ka seng Congress kala ong ba ka Agatha bad u James ki leit ban sam pisa na kawei ka iing sha kawei pat ban ong ia ki briew ban jied ia u kyrtong ka NPP ha ka shnong Taktaki, hynrei ki nongtrei jong ka seng congress kila pyntip sha ka halor kane ka jingleh jong kito ki nongialam ka NPP kala kynnoh ha ka Ejahar kaba la soi da ka Miani D Shira.
Ka Miani kala ong ba u James u la pyndon kam ia ki kali pulit kiba synran ban hukum ia ki ba kin khynra ia ki kali jong ki nongkit kam ka seng Congress bad kine ki nongsynran kila khynra arsien ia ki kali jong ki nongkit kam ka seng Congress bad kim shym la lap ei ei la kam ka kyrtong ka seng Congress.
Hynrei ha dien la lap ba ki don ki tiar ba nep ba lah ban pynmynsaw ia kaba la buh haki kali jong ka seng Congress bad ki sa shon dur la kynnoh ka Miani D Shira. Ka Miani kala ong ba ia ka tiar ba lah ban pynmynsaw ka dei na ka kali Bolero rong jngum katba ka kali kaba ki dkhot jong ka seng Congress ki pyndon kam dei ka Scorpio rong lieh.
Ha kane ka por ki kali ki don haduh 11 tylli kyntup ia ki kali pulit la kam ka Miaini kyrtong ka seng Congress. Ka Miani kala ong haba la poi ha katei ka jaka u Daryl u bethah ia ki magistrate ba kin shim dur ia ki shympriah kti, hynrei ha kane ka por ka Agatha ka long ong ba la bun kiba ktah ia ka tiar pynmynsaw kam long shuh kaba dang lah ban lap ia ka jingshisha la kynnoh ka kyrtong Congress.
Halor ka jingkynnoh jong ka Agatha ba ki dkhot jong ka seng Congress kila beth kthong ia ki dkhot jong ka NPP, ka Miani kala ong ba kumno kane ka lah ban long namar ki ia wan na ka liang kaba long mar pyrshah kam dei ba ki bud na dien jong ki nongkit kam ka NPP.
