Shillong, Jyllalyngkot 17: Ka Khun Hynniewtrep Trep National Awakening Movement, State Youth Wing ka la pan ia ka RTI na ka Shillong Municipal Board bad wad jingtip halor ki nongshong madan ki bymdei ki trai ri trai muluk ki ba don haka nongbah shillong, la pan ruh ia ki labour licence bad work permit jong kine ki nongshong madan.
Ha ka jubad ba la ioh pdiang da ka seng la iathuh ba ka Shillong Municipal Board ka la dep ban register ia baroh ki nongdie madan ki ba shong ha ki thain bapher bapher jong ka nongbah Shillong bad ka SMB ka la ai jingbit ruh ia ki naduh ka 31.3.2017. hynrei la lap lyngba ka RTI ba kine ki nongshong madan ki bymdei ki trai ri trai muluk kim don ia ka labour licence bad work permit kaba long pyrshah ia ki ain ba la don ha ka jylla.
Ka seng ka pynpaw ka jingsngew lyngoh ba kumno ka SBM ka register ia kine khlem da pynthikna ia ki kot ki slab a dondam katkum ka ain, ka jingshim sting jong ka KHADC ban phah ia ki enforcement ban leit ban khynra ia ki kot ki sla na ka por sha ka por ruh ka ai mynsiem bad ai lad ia ki riew shim kabu.
Ka KHNAM Youth Wing ka pynrem jur ia kum kine ki jingleh thurmur jong ki bor ba dei peit. Ka seng ka la thoh sha ka CEM jong ka KHADC ryngkat ka copy jong ka RTI ba la ioh da ka seng, bad ruh la thoh sha U Under Secretary to the Govt of Meghalaya, Urban Affairs Department bad ki dawa ba ka KHADC kan pyndep ia la ka jong ka kamram ban khynra bad peit ngor ia kane ka bynta, bad ruh ba ka SMB kadei ban mait kyrteng lut ia baroh ki bar jylla ki bym don ia ki labour licence bad Work permit kiba biang. La ong u bah Thomas Passah ha ka kyrwoh mynta ka sngi.
