Shillong, Lber 21: Kum shi bynta ban rakhe ia ka lyngkhuh snem kaba 41 jong ka Khasi Students’ Union (KSU) kaba hap ha ka sngi Balang, ka KSU Mawprem Circle ka la noh synniang da ki kopi skul sha ki khynnah pule kiba wan na ki longiing baduk kiba sah ha ka thain Mawprem. Ia kane ka jingiarap la pynlong ha ka Community Hall jong ka Dorbar Shnong Mawprem ha kaba la noh jingiarap haduh 600 ngut ki khynnah pule kiba wan na ki longiing BPL bad AAY kiba sah ha ki thain Mawprem, Dymmiew bad Mawbah.
Ha shwa ban sam ia ki kopi skul sha ki khynnah pule, la pynlong shwa ia ka jingialang ha kaba u bah Shemphang L. Mawphlang u Vice President, KSU CEC u la long kum u kongsan. Ha ka jingialang ba la pyniaid da u samla Badonkupar Nongbri President, KSU Mawprem Unit), la ioh jingkren na u samla Arristone Thabah (VIce President, KSU Mawprem CIrcle, samla Raplangki Dhar Education Secretary, KSU Mawprem Unit.
Kiwei kiba la ia don lang ki long u samla Donald V. Thabah General Secretary, KSU CEC bad u samla Shemphang L. Mawphlang ha ryngkat ka jingiadonlang u samla Biangbor Paliar Organising Secretary, KSU CEC bad kiwei kiwei ki nongialam ka seng kiba la ia don lang.
Ka jingthmu ba kongsan jong ka KSU Mawprem CIrcle ban sam ia kine ki kopi ka long kum shi bynta ruh ban ai jingkyrmen ia ki khynnah pule kiba wan na ki longiing baduk kiba thrang ban iai bteng ia ki jingangnud jong ki ban pule kham shakhmat. La ong u samla Arristone Thabha Vice president ka KSU Mawprem Circle.
