Jowai, Iaiong 08: Ka Khasi Students’ Union War Jaintia Circle hapoh ka jingialam u President Samla Laitphar Syngkrem, Samla Lurman B Talang General Secretary bad Samla Kindly Khyriem Finance Secretary ryngkat bad ki dkhot mynta u bnai ka la leit ai jingiarap da u khaw sha ki 24 tylli ki shnong kiba hap hapoh ka Amlarem Sub Division.
Ka Seng hadien ba ka la ioh jingtip ba don shibun ki longiing longsem kiba kup shilliang sem shillang wat tang ban thied ia u khaw ruh kim ioh bad ki don ruh kiba la duna khaw ban shet ka seng kam banse ban shimkhia ia kane ban pynpoi ia u khaw sha ki shnong bapher bapher hapoh War Jaintia.
Ha kane ka jingleit ai jingsam jingiarap la aiti beit ia ki khaw sha ki Rangbah Shnong bapher bapher ban peit bad sam ia ki khaw sha kito ki longiing longsem kiba ibit bad dei hok ban ioh ba la jied da ka shnong. Ka seng katba lah la ka bor barit kan iai kner ki kti ban kit ban bah lang ha kum kine ki por ba ki briew ki shem jynjar shem lanot ban iarap ia ki.
Ka seng ka pynpaw ia ka jingpynrem namar ka jingiohthiah lyngngai ki Nongmihkhat jong ngi hapoh War Jaintia namar wat haduh mynta kim pat shym la don kino kino ki lad ban leit ai jingiarap sha ki paidbah ka thain baroh kawei.
Ka seng ka kyntu sha baroh ki nongmihkhmat jong ngi ba kin sngewbha ban leit jngoh ne leit mih sha ki shnong briew khnang ba kin iohi da la ki jong ki khmat haduh katno ki briew ki donkam ka jingiarap.
Ka seng ka panmap sha kito ki shnong kiba ngim pat poi ban leit ai jingiarap bad ngi kyrmen skhem bad ialeh shitom katba lah ban wan ai jingiarap iaphi ruh ha kawei pat ka por. Ia kane ka kyrwoh la phah da u General Secretary Samla Lurman B Talang.
