Shillong, Lber 28: U Bah Rocky Hek mynta ka sngi u la ai jingiarap ia ki long iing kiba duk kiba sah ha Pynthor ba kin ioh ban thied bam namar ba kim ioh ba leit bylla na kane ka jingkhang ban ia leh pyrshah ia u COVID-19.
Haba kren ha u SP News Agency u bah Rocky u la iathuh ba kane ka jingiarap ka long ia kito ki long iing ki bym don shuh ka lat ka lynti ba kin thied bam ha iing namar kim shym ioh leit ban bylla ha kine ki sngi namar kane ka jingkhang ban ialeh pyrshah ia u khniang jingpang COVID-19.
La iathuh ba kane ka jingsam ka long kumba 700 tylli ki long iing bad ka jingai jingiarap ka long ha pdeng T.500/- tyngka bad T.700/- katkum ka jingdon kam jong ki, kane ka jigniarap ka long tang ba kin ioh thied bam ha iing ha sem.
La iathuh ruh ba ha kane ka taiew ban wan un sa sam khaw ha ki shnong kum ka Mawkhar, Wahingdoh, bad kiwei ki shnong kiba hap hapoh jong ka 17-Shillong North Constituency.
