Ai jingkyrshan ka KSU ia ka rai jong ka NESO ban ia khih na North East Baroh kawei

Shillong, Kyllalengkot 06: Ka Khasi Students’ Union (KSU) Central Executive Council ha ka jingialang ba kyrkieh mynnin ka sngi kata ka 5 tarik u Kyllalyngkot 2019 ka la shim ia ka rai ban kyrshan tyngeh ia ka rai jong ka North East Students’ Organisation (NESO) ban pylong ia ka jingiakhih ha ka sngi ba ar.

Ka KSU kaba long dkhot hapoh ka NESO ryngkat lang bad ka All Assam Students’ Union (AASU), All Arunachal Pradesh Pradesh Students’ Union (AAPSU), All Manipur Students’ Union (AMSU), Garo Students’ Union (GSU),  Twipra Students’ Federation (TSF), Naga Students’ Federation (NSF) bad ka Mizo Zirlai Pawl (MZP) da kawei ka sur ka pynbna ba ia kane ka jingiakhih yn pyntreikam pura hapoh ka jylla Meghalaya khamtam hapoh u pud u sam ka Bri U Hynniewtrep kumba long lem ha kiwei ki jylla ka thain shatei lam mihngi.

Ka KSU na ki por sha ki por ka ju pynpaw ia ka jingpyrshah ia ka Citizenship (Amendment) Bill 2016 kaba thmu ban ai syrnod nong India ia ki poiei ba na kiwei pat ki ri kiba ngeit ia ki katto katne ki niam. Ka seng ka sngewthuh ba lada yn pyntreikam ia kane ka Bill ka jingma kaba khraw ka ap ia ki Jaidbynriew rit paid ka thain shatei lam mihngi kumjuh ruh ia ka Jaidbynriew Khasi kaba don tang 13 lak.

Ka KSU kala ong ba katkum ka jingtip ba ki don haduh 140 lakh ngut ki riewngeit Hindu ha Bangladesh, kan long kaba shyrkhei lada yn pynkylla ain ia kane ka Bill namar ka long kum u shabi ban plie ia ka khyrdop ia kitei ki nong Bangladesh ba kin wan buhai shnong khlem jingteh lakam hapoh ka thain shatei lam mihngi kynthup ruh ha ka Bri U Hynniewtrep.

Lada tang 20 lak na ka 140 lak jong kitei ki riewngeit Hindu na Bangladesh kin wan shong shnong noh ha ka Bri U Hynniewtrep ka mut ki Khasi ki la kylla ki rit paid ha la ka jong ka Ri bad ia kane lah ban sakhi kumno ha jylla Tripura bad Assam ki trai ri trai muluk kum ki Tripuri, ki Jamatia, ki Reang, ki Ahom, ki Bodo, ki Mising bad kumta ter ter kila duh lut ka hok longtrai ha baroh ki liang ha ki poiei kiba wan na Bangladesh.

Ka jingkhot ia kane ka jingiakhih ka long halor ka jingai jingkular u myntri Rangbah duh ka ri India u Narendra Modi ha ka rally kaba long ha Silchar, Assam ha kaba u la kular ba shen yn pyntreikam noh ia ka Citizenship (Amendment) Bill 2016 kaba long ka jingkren kaba pyni ba um khein snep khyndiat ruh ia ki rit paid trai ri trai muluk ka thain shatei lam mihngi.

Kumta ka seng ka kyntu ia baroh ki paradoh parasnam ba kin kyrshan tyngeh ia kane ka jingiakhih khnang ba ki jingangnud jong ka NESO bad ka KSU kin long kiba jop. kane ka jingiakhih kan ym kynthup ia kito kiba donkam kyrkieh khamtam ia ki kam ki bym lah kiar kum ki nongthoh kotkhubor, ki nongaidud, ki nongleit hospital, ki jingiakyntiew kurim, ki jingiaseng bad kumta ter ter. La ong u bah Donal V Thabah ha ka kyrwoh kaba la phah mynta ka sngi.

 

What Next?

Recent Articles

Leave a Reply

Submit Comment

*