New Delhi, Iaiong 25: Ka Cabinet Committee halor ka Economic Affairs ba la pyniaid da u Prime Minister, Narendra Modi mynta ka sngi ka la mynjur ia ka scheme jong ka sorkar pdeng ka, National Bamboo Mission (NBM) hapoh ka National Mission for Sustainable Agriculture (NMSA) ha ka samoi ba dang sah jong ka Fourteenth Finance Commission 2018-19 bad 2019-2). Kane ka Mission kan pynthikna ia ka roi ka par ha ka bamboo sector da kaba weng ia ki jingeh bad wanrah ka jingiadei ba lah ban ai jingmyntoi ia ki nongrep bad ki karkhana.
Ka CCEA ka la mynjur ruh ia ka Empowerment of Executive Committee ban thaw ia ki kyndon jong ka NBM bad ban pynkylla hangne hangtai, ba kynthup ia ki kyndon jong ki dor jong ki prokram bapher bapher na ka por sha ka por katkum ka jingdonkam bad ka jingai jingmut jong ki jylla, da ka jingmynjur jong u myntri ka rep ka riang jong ka sorkar pdeng bad ka seng ki nongrep.
Ka sorkar pdeng kala mang pisa T.1290 klur naka bynta kane ka kam bad ka sorkar pdeng kan bei T. 950 klur . La mynjur na ka bynta ban pyntreikam ia ka Mission ha ka samoi ba dang sah jong ka 14th Finance Commission (2018-19 bad 2019-20).
Kane ka scheme kan ai jingmyntoi ia ki nongrep kumjuh ruh ki nongthain kti ha ka thain bad ki briew kiba iadon bynta ha ka bamboo sector ba kynthup ia ki karkhana. Namar ba la tyrwa ban thung siej ha ka jaka kaba shi lak ha, la khmih lynti kumba shi lak ki nongrep kin ioh jingmyntoi ha ka liang ka rep ka siej.
Ka Mission ka phaikhmat ha ka jingkyntiew ia u siej ha ki katto katne ki jylla ba don ka jingmyntoi ha ka imlang sahlang, ka jingpyniaid iew bad ka ioh ka kot, khamtam ha ka thain shatei lam mi hngi bad ki jylla ba kynthup ia ka Madhya Pradesh, Maharashtra, Chhattisgarh, Odisha, Karnataka, Uttarakhand, Bihar, Jharkhand, Andhra Pradesh, Telangana, Gujarat, Tamil Nadu bad Kerala.
Ka jingthung ia ki siej kan iarap ha kaba kyntiew ia ka jingmih na ki jaka rep bad kane kan kyntiew kylla ia ka ioh ka kot jong ki nongrep. Kan pynlong ruh ba ki karkhana kin ioh ia ki mar kiba bha. Kumta, kane ka Mission kan wanrah ym tang ia ka jingkyntiew jong ka ioh ka par jong ki nongrep hynrei kan iarap shibun ruh ia ka jingpynneh ia ka Mei Mariang. Kane ka Mission kan wanrah ruh ia ka lad ioh kam ioh kam.
