Shillong, Jymmang 08: Ka seng KHasi Jai
ntia National Union(KJNU) mynta ka sngi kala leit ban ai da ka jingthoh sha u myntri kam poh iing ka jylla u James K Sangma ha kaba ia dei bad ka jingkit palat pud jong ki trok kit dewiong ha Jiantia Hills.
Ha kane ka jingthoh kaba la ai sha u myntri kam poh iing da u bah Niman Shadap President u la ong ba ka jingbit ia ki trok ban kit dewiong ka dei ban long 9 metrik tone bad ia kine ki trok kit dewiong la peit da ki pulit ha man ki jaka ba don ki police station.
Ia ki trok kit dewiong kiba mih na Jaintia Hills kila hap ban iaid lyngba ka, Lumshnong Police station, Untyra, Lad Sutnga, Tuber Sohshrieh kine ki hap hapoh jong ka East Jiantia Hills, kiba hap hapoh jong ka West Jiantia Hills pat ki ki long ka Jowai Police station ia kaba la peit ia ki kali ha Phramer bad ha Soomer –Mukhla, ka Mawryngkneng, Diengpasoh Police Station ha East Khasi Hills bad ka bad ka Umroi PIC kaba hap hapoh Ri Bhoi District.
Na ka liang jong ka KJNU ka la ong ba ha kine ki jaka ba dei ban peit ia ki kali kit dewiong la ap tang da ki pulit langrut , ka seng kam juh iohi ban don ki heh pulit ban peit ia ki kali kiba kit palat pud. Wat la ki trok ki hap ban iaid lyngba ia shibun ki polie station, kaba pynllyngoh ka long ba ki trok kit dewiong ki dang ioh ban kit palat pud.
Na ka liang jong ka KJNU ka buh ka jingkylli ia u myntri kam poh iing, katno tylli ki jaka ki don kaba ki pulit ki hap ban jurip iaki kali kit dewiong, hato kane ka jingjurip ki pulit ia ki kali kiba iaid ka long ia baroh ki kali ne tang ia ki trok, katkum ki kyndon hato ki pulit langrut ki lah ban jurip ia ki kali hato la ai bor ne em da ka NGT, hato ia ki kali kiba iaid ka don hok ba ki pulit kin dain kuna ha ka jaka ba ki bat ia ki kali haba ki pynkhein ia ki kyndon jong ka NGT
Ka KJNNU, ha ka jingthoh kaba la ai mynta ka sngi kala dawa na u myntri ba dei ban phah tohkit ha kaba ia dei bad kitei ki jingkylli kiba ka seng kala buh, ha ka juh ka por ba balei lajuh jurip ia ki trok tang ha ka por miet da ki pulit jong ka jylla Meghalaya. Ka seng kala ai por ia ka sorkar shitaiew ba kan phah tohkit.
