Shillong Jymmang 12: Ki nongialam ka Voice of the People Party (VPP) mynta ka sngi ki la leit ban aiti ia ka shithi sha ka sorkar jylla ban dawa ba kadei ban pynsahngeh shwa ia ka jingthung kam ha ki tnad sorkar bapher bapher ha jylla.
U President ka VPP u bah Ardent Miller Basaiawmoit haba kren ha ka jingialang ba long ha Parking Lot, Additional Secretariat, u la ong ba ki dawa ba ka sorkar jylla kadei ban sahngeh ka jingpynrung kam ha ki kam sorkar khlem pat peit bniah ia ka Reservation Policy.
Na ka liang jong ka VPP, ki la buh por ia ka sorkar jylla ba hapoh ka 48 kynta kadei ban pynmih ia ka Notification ban pynsahngeh ia baroh ki jingthung kam bad lada kam lah ban pynmih ia ka jingpynbna ka VPP kan pynlong ia ka jingiakhih.
U bah Ardent u la ong ba ka jingiakhih jong ka VPP kadei halor ban pynbeit ia ka bhah thungkam thungjam ym ban pynduh ia ka Reservation Policy.
U President ka VPP u la ong ba ka VPP kumba ka la kular ha ka por ilekshon kumta ka ieng ban iakhih na bynta ka jaidbynriew ha kaba ia kane mat ka Reservation Policy ka la rah ban iakren sha Iing Dorbar Thawain.
“ Hynrei haba kim ailad ban iakren ia kane ka mat ha Iing Dorbar Thawain ka jylla, ngi la hap ban mih madan ban pynlong da ki jingiakhih ban pynbor ia ka sorkar ba kadei ban pynbeit ia kane ka Policy kaba la noh shilliang bad ka bym hok,” la ong u bah Ardent.
Na ka liang jong ka VPP ka la kyntu ia ki paidbah ka jylla ba kidei ban mih ban ai ka jingkyrshan ia ki jingiakhih namar ki paidbah ki long ka bor bad ka sorkar kan hap ban sngap lada ki paidbah ki mih ryntih ban pynsngew ia ka jingeh.
