Jowai, Naitung 12: Ka Jaintia Students’ Union (JSU) Sengkmie lyngba ka Art & Culture Committee bad kumjuh ha ryngkat ki Circle bad Unit jongka ka shim ia kane ka kabu ban pynpaw iaka jingsngewkmen ban pathai ia kane ka khubor ban ai khublei kyrpang bad kitbok kitrwiang ia baroh ki khun ki hajar jongka Ri lum Jaintia khamtam eh iaki khun ka Niam Trei kiban rakhe iaka Beh Dein khlam jongki raij bapher bapher, mynta U snem 2017.
Na ka liang ka JSU hi baroh kawei ka phah ia kane ka jingai khublei bad kit bok kitrwiang sha baroh lang ki paidbah ba lyngba kane ka jingrakhe don burom ia kane ka Behdeinkhlam ngin ioh shibun ki kyrkhu kyrdoh na u TreKirot Kynrad khnang ba ngim ioh iaka jingkoid jingkhiah, ka jingman bha nam miat haka trei ka ktah, ka pule puthika shongsuk shongsain hapoh ka imlang sahng baroh kawei.
Ha ka juh ka por ai ba kane ka jingrakhe iaka Beh Deinkhlam kan wanrahruh khamtam iaka jingiatylli hapdeng ka jaitbynriew jongngi khnang ba ka ri bad ka jaitbynriew kan nangroi parum pareh haki sngi ki por ki ban dangwan ha baroh ki liang.
