Naiwieng 08: U President jong ka BJP Meghalaya State Unit u Bah Shibun Lyngdoh u la ong ba kum ka party baroh kawei ka ai khublei kyrpang ia ki paidbah ha kane ka jingdap shisnem jong ka jingkylliang ia ka pisa, kiba la ai ka jingkyrshan ia ka sorkar BJP ha Delhi hapoh ka jingialam jong myntri rangbah duh jong ka Ri U Narendra Modi.
Haba kren ha ki nongthoh khubor mynta ka sngi ban kynmaw ia ka jingdap shisnem ka jingkylliang pisa, u Bah Shibun u la ong ba ka jingthmu ban kylliang ia ka pisa la sdang ha ka sorkar Congress ha u snem 2005 bad la pyrshang biang ha u snem 2008, hynrei kim shym la leh namar ki tip kham bha ia ka daw.
Haba la wan ka sorkar BJP ha Delhi na ka liang jong u myntri rangbah duh jong ka Ri u la lum ia ki stad pyrkhat ban ia mir jingmut ha kaba ia dei bad kane bad ha dien ba la dep ban ia kren u la shim ia ka rai ban kylliang noh ia ka pisa ka kot shihajar tyngka bad ka ka kot san spah tyngka.
Ka jingthmu jong kane ka jingkylliang ia ka pisa ka long, ban the la kam ia ki kam lehnoh, ka jingbuhrieh ia ka pisa bam klop, bad ban khanglad ia ki pisa thok kiba la jyllei hapoh jong ka Ri. Na ka liang jong ka BJP ka shem ba kane ka jingkylliang pisa ka long kaba jop ha kaba 80% ki kam lehnoh haka Ri kila duna, ka pisa bam klop kaba la buhrieh kala poi biang sha ki Bank bad ka jingdon ka pisa thok kam don shuh.
Haba phai sha ka jylla Meghalaya, u Bah Shibun u la ong ba da kane ka jingkylliang ia ka pisa kala pynduna ia ki kam lehnoh khamta haki lum Garo ha kaba ki kam leh noh kila hiar bad ka jingshong suk kala sdang ban wan, hynrei ka jingialeh ka dang don ban weng ia kane ka jingeh.
