Ai khublei ka JSU iaki nonghikai baroh ha ka sngi burom jong ki la shai ka sngi

Jowai, Nailur 04: Ka Jaintia Students’ Union (JSU) lyngba ka Education Cell, haka jingpyllait khubor mynta ka sngi ka pynpaw ba ki nonghikai ki dei shisha ki mawjam ba nyngkong eh jong u wei pa uwei ne kawei pa kawei  shaka kyrdan jongka jingnang jingstad. Ka kam nonghikai ka dei ka kam kaba khuid bad kaba kyntang bad dei lyngba ka jingtrei shitom bad duriap jongki nonghikai iala ka kam ba ki khynnah skul ki sa ioh iaka jingnang jingstad naka bynta ka lawei ba phyrnai jongki.

Shuh shuh,  ha kum kane ka sngi khraw jong ki nonghikai, ka Jaintia Students’ Union (JSU) kam lah satia ban klet lane khlem da kynmaw iaka jingtrei shitom bad ka jingaiti lut ki nonghikai baroh met bad mynsiem naka bynta ban pathai bad pynrung iaka jingnang jingstad haka jabieng jongki khynnah skul baroh.

Hooid, ka Jaintia Students’ Union, kam lah ruh khlem da pynpaw iaka jingsngewsih kaba khraw haba iohi ba wat lada ki nonghikai ki trei iaka kam kaba khuid bad kaba eh duh, hynrei ki hap ban mih ruh shaduh surok ban dawa iaka bainong lane ka hok kaba ki ban ioh, namar ka sorkarhi  ka leh klet bad leh byn suitniew  iaki jingdawa ba shongnia ki jongki.

Kumta ka Seng ka sngewdei ban pynpaw hangne tang kawei ba lada ka Sorkar hi ka thrang shisha ban kyntiew iaka jingnang jingstad hapoh ka jylla jongngi lane hapoh ka ri hi baroh kawei kam dei satia ban leh lyndet iaki nonghikai namar ka jingleh  lyndet iaki nonghikai ka dei ruh ka jingleh lyndet iaki khynnah skul.

Khatduh khatwai, ka Jaintia Students’ Union (JSU) ka buh iaka jingkyrpad ia baroh ki nonghikai ba ieid ba wat ha pdeng kine ki jingeh kiba bun ba kin nangtur shaphrang ha ki kam ba khraw jongki naka bynta ban ai bad sam lem iaka jingnang jingstad ha ki khynnah skul kiba dei ka lawei jongka Ri bad ka Jaitbynriew. Bad kum ka Union ka shim ia kane ka kabu ban ai khublei kyrpang bad kitbok kit rwiang  ia baroh ki nonghikai ha kane ka sngi khraw jongki (Teachers’ Day) bad ai ba u Blei u nang kyrkhu kyrdoh bad ai shuh shuh haki iaka jingstad ban jingshemphang naka bynta ban pyndep hok ia ka kam jongki.

What Next?

Recent Articles

Leave a Reply

Submit Comment
*