Shillong, Naitung 05: U Bah Kitborlang Nongrem Chairman jong ka Ranikor Civil Sub Division Demand Committee (RCSDDC) u la ai khublei kyrpang ia ka sorkar Meghalaya Democratic Alliance (MDA) hapoh ka jingialam jong u Conrad K Sangma kum u myntri rangbah ka jylla u ba la lah ban kyntiew ia ka Ranikor Administrative Unit sha ka Ranikor Civil Sub Division kaba hap hapoh jong ka South West Khasi Hills District, ia kaba yn sa plie ha ka 10 tarik mynta u bnai.
Na ka liang jong ka RCSDDC, ka khot kawer ia baroh ki paidbah kiba hap hapoh jong kane ka Civil Sub Division kaba ynsa plie thymmai da u symbut myntri rangbah ka jylla u Bah Prestone Tynsong ba kin ia wan lang ha katei ka sngi sha Ranikor ban ia sakhi lang ia kane ka sngi sah kynmaw hapoh ka dong bad ka thain baroh kawei.
U Bah Nongrem, u la kyrpad ia baroh ki rangbah shnong, ki seng bhalang, ki seng sain pyrthei bapher bapher ba kin ia poi lang ha kane ka sngi. La kyrpad ia baroh ba kin sngewbhalang ban shim ia kane kum ka jingkhot namar ka por kaba lyngkot ym lah shuh ban phah sha phi iwei pa iwei da ka jingkhot hynrei shim ia kane kum ka jingkhot sha katei ka jingplie ia ka Civil Sub Division.
Na ka liang jong u Chairman ka RCSDDC u la iathuh ba katkum ka jingpynkhreh la dei ban plie ia ka Civil Sub Division da u myntri rangbah ka jylla u Conrad K Sangma, hynrei na ka daw ba ka don ka jingialang jong ka North Eastern Council, ha Shillong ha kaba baroh ki Lat bad ki Myntri rangbah jong ki jylla ka dang shatei lam mihngi ki hap ban ia don lang ha kaba yn pyniaid da u Myntri kam poh iing ka sorkar pdeng u Rajnath Singh.
Na ka liang jong ka sorkar jylla kala pynbeit ba ia ka jingplie ia ka Ranikor Civil Sub Division ha ka 10 tarik mynta u bnai la pynbeit ban plie noh da u symbut myntri rangbah ka jylla u Bah Prestone Tynsong ha ka jingiadon lang kiwei kiwei ki myntri jong ka sorkar jylla ha kane ka sngi.
