Ai khublei ki nongtrei sorkar ia u Dr Mukul bala pyntrei kam ia ka tulop thymmai

Shillong, Naiwieng 22: Ki nongkit kam jong ka seng ki nongtrei sorkar ia kaba la tip kum ka Meghalaya State Government Employees’ Federation (MSGEF) mynta ka sngi kila leit ban ia kynduh ia u myntri rangbah ka jylla u Dr Mukul Sangma ban pynpaw ia ka jingsngewnguh ka jong ki ia ka sorkar kaba la pyntrei kam ia ka tulop ba thymmai ha 5^th Pay Commission.

Katkum ka rai jong ka kabinet kaba la long ha kine ki sngi na ka liang jong ka sorkar kala shim ia ka rai ba kane ka tulop thymmai jong ki nongtrei sorkar kan trei kam noh haduh u bnai Nohprah jong u bnai ban wan ia kane la pynbna u myntri rangbah ka jylla u Dr Mukul Sangma.

Kum ka dak jong ka jingsngewnguh bad sngew burom ia ka sorkar ki nongialam jong ka seng ki nongtrei sorkar mynta ka sngi kila leit ban ai khublei kyrpang ia u myntri rangbah ka jylla kum ka kynhun ha ophis trei kam jongu myntri rangbah u Dr Mukul.