Shillong, Nailar 14: Kiba ha iing u samla Dajied Kynsai Syiemlieh ki la pynpaw ia ka jingsngewnguh ia u SP ka South West Khasi Hills District u Bah Herbad Lyngdoh bad kumjuh ruh ia ki pulit ka Bangladesh kiba la trei shitom ban pynlait im ia u khun na ki kti ki suba leh noh kiba la rah bor sha Bangladesh.
Lah ban shu pynkynmaw u samla Dajied ula shah rahbor ha ki suba lehnoh ha ka 27 tarik u Iaiong mynta u snem bad la ioh ban pynlait im noh da ki pulit ka Bangladesh ha ka 15 tarik u Jymmang bad ula ioh ban wan phai biang sha iing ha ka 9 tarik u Nailar.
U samla Dajied Kynsai Syiem uba la shah rahbor ha ki suba lehnoh haba ai jingkren ha ki nongthoh khubor ula ong,ka jingshah rah bor ha ki suba lehnoh ka dei na ka jingithuh bakla ki lehnoh kiba mut ba u dei u manager da ka jingthmu ban dawa pisa hynrei u dei pynban da u khynnah bylla.
U samla Dajied ula iathuh, naduh ba ki suba lehnoh ki la rahbor ki la teh ia ki kti bad ki ju pynshitom bein da kaba shoh man ka sngi khamtam mynmiet.
“Ka dei ha ka 15 tarik u Jymmang ki lehnoh ki la ia thuh pyrshah ban kin pyniap noh ia u ha katei ka miet hynrei da ka jingtrei shitom ki pulit ka Bangladesh kiba la ioh jingtip ba tikna na ki lad syntiak khappud la ioh ban pynlait im noh ia u”,la ong u samla Dajied.
U Bah Rijoy Sing Basaiamoit u kpa u Dajied ula iathuh,hadien ba ki suba lehnoh ki la rahbor ia u khun jong nga ka la wan ka phone call na ki nongrahbor kiba la dawa pisa 1 klur tyngka hynrei hadien ka jingia kren ki la pynhiar sha ka 50 lak bad ba nga la pynpaw ia ka jingbym lah siew ki la pynhiar sha10 lak tyngka ia kaba nga la mynjur ban siew.
“Hadien ka jingioh pdiang ia ka phone call na ki suba lehnoh nga la pyntip sha ki pulit ia kaba nga la mut ban siew ia ka pisa ha ka miet 15 tarik ia kaba ki pulit ki la ioh ban pynlait im noh ia u khun jongnga”,la iathuh u Bah Rijoy.
