Shillong, Jymmang 18: U Symbut Myntri Rangbah ka jylla u bah Prestone Tynsong mynta ka sngi ha ka kyrteng jong ka sorkar u la ai khublei kyrpang ia baroh kiba trei ha kane ka jingialeh pyrshah ia ka khlam COVID-19 naduh kiba rit eh haduh ki Deputy Commissioner jong ka District.
Ka sorkar ka pynpaw ia ka jingsngewnguh ia baroh kiba la ia trei shitom ban leit shaw ia ki nongshong shnong jong ka jylla kiba la wan na shabar bad ki doktor ki nurse kiba la trei shitom ban test ia baroh kiba la wan phai sha la ki shnong, ka jingkhublei ka leit sha baroh kiba la ai don kti lang ha kane ka kam.
La iathuh ba ka Rel kaba mih na Bangalore ka dang mih mynta ka sngi bad kan poi sha Guwhahati ha ka 20 tarik baroh kiba la ioh jingtip ki long 1250 ngut, hynrei kala lah ban tam ia kane ruh la ong u bah Prestone. La iathuh ba ban test ia kiba wan phai yn leh katkum ki District.
Na ka Bynta ka West Khasi Hills District yn lah ha Mairang bad Nongstoin, na ka bynta ka South West Khasi Hills ha Byrnihat bad na ka bynta ka East Khasi Hills yn leh noh ha Polo Shillong.
La iathuh ruh ba ka jylla Meghalaya ruh kala pynjari biang ban pynjlan ia kane ka jingpakhang haduh ka 31 tarik mynta u bnai kumna la pynbna da ka sorkar pdeng. Haba ia dei bad ki kyndon kiba la sorkar pdeng kala phah ka sorkar jylla kan dang ia shong bad ia ki rai kiba ka sorkar ka shim kan sa pynbna ha kine ki sngi.
Haba ia dei bad ka jingiarung iamih jong ki briew na kawei ka jylla sha kawei ka jylla na ka liang jong ka jylla Meghalaya haduh mynta kam pat shah ban ia rung ia mih bad ia karai kin sha shim ha dien ka 31 tarik ynda kane ka national lockdown kan kut ha ka 31 tarik mynta u bnai.
