Shillong, Nailar 15: U Myntri Rangbah ka jylla u Conrad K Sangma ha ka jingkren ha ka jingrakhe ia ka jingleitluid kaba 75 snem jong ka Ri India mynta ka sngi ha madan polo u la pynpaw ia ka jingai khublei ia ka sorkar pdeng kaba la ai ka jingkyrshan ha ka jingiakren ia suk bad ka seng HNLC.
U Myntri Rangbah u la ong ba ka shong suk shong sain ha ka jylla ka suk ka sian bad u la ong ba u sngew tynnad ban pyntip ba kala poi sha ka jingiasngewthuh jingmut ban ia kren ia suk bad ka seng HNLC khlem da don kano kano ka jingiabuh kyndon.
U Mytnri rangbah la ong ba ka jingiakren kan long hapoh ki kyndon jong ka riti synshar jong ka Ri India, la ong ka jingiakren ia suk kala sdang bad ka sorkar jylla kan pynthikna ba kane ka jingiakren lah ban pyndep kham kloi.
Ha kane ka sngi u mytnri rangbah u la kren ruh shibun kiba ka ka sorkar kala leh khamtam ha ka jingiapynbeit pud bad ka jylla Assam kaba la sah teng mynta la san phew snem, baroh ki sorkar kiba la leit noh kila pyrshang hynrei myta kane ka sorkar kala shim ia ka sien jam kaba khampher ban pynbeit ia kane ka jingiakajia pud.
Ban burom ia ki nongialeh laitluid jong ka jylla, ka sorkar ban pynsah nam ia ki ha kane ka jingdap 50 snem ka jylla ka jingshna ia ka dur mot ba shiynieng jong u Tirot Sing Syiem, Kiang Nangbah, Pa Togan N Sangma kala iaid sha khmat.
Ia ka Kiang Nagbah Indigenous Knowledge bad Cultural Centre-cum-Tribal Museum’ ha Jowai, ha West Jaintia Hills bad ia ka Tribal Research Institute at Babadam, West Garo Hills ka jingtei ia ki kala iaid sha khmat.
Ia ka Tirot Sing Memorial Space, kaba la mang da ka sorkar pdeng ynbuh ha ka jaka bala mang kyrpang ban pynneh pynsah ia ki riti dustur jong ka Ri India ha Dhaka jong ka Ri Bangladesh ka jingshna ka dang iaid mynta da ka jingkyrshan ka sorkar India.
Ha kane ka sngi u myntri rangbah u la kynmaw burom ia baroh ki nongialeh laitluid jong ka Ri India bad kum juh jong ka jylla bad kane ka thianshatei lam mih ngi, u myntri rangbah la kren ia shibun ki kam kiba kane ka sorkar kala leh ban kyntiew ia ka jylla ha baroh ki liang.
Na ki skhim kiba la don bad kiba la juh pyntrei ha ka sorkar, kaba kham pher ka long ba ka sorkar kan sa pynmih ia ka skhim ri balang khamtam ha ki shnong khappud bad ka Bangladesh namar ka jingdawa ia ka doh Blang ha Bangladesh ja hur bha.
Ha kane ka sngi rakhe ia ka sngi laitluid ka Ri India la pynhap syntiew da ka Helicopter jong ki shipai suin, la don lang u Chief secretary ka jylla, u bah DP Wahlang, ki heh sorkar bad ki heh shipai, ha kaba da ki hajar ngut ki paidbah kila poi ban ia shim bynta ban rakhe ia kane ka sngi.
