Shillong, Sept 04: U President ka India, u Ram Nath Kovind u la ai khublei ia ki nonghikai ha kylleng ka ri ha ka janmiet shuwa ka sngi kyrpang jong ki.
Ha kane ka jingai khublei jong u, u President u la ong, “Ngi rakhe ia ka sngi kyrpang jong ki nonghikai kum ka dak jong ka lyngkhuh sngi kha jong u nonghikai, u riewshemphang bad u President ba rim ka India, u Dr. Sarvepalli Radhakrishnan. Nga ai khublei kyrpang ia baroh ki nonghikai ha kane ka sngi kyrpang jong ki.
Ka sngi kyrpang jong ki nonghikai ka dei ka sngi ba ngi ai burom ia ki kam jong baroh ki nonghikai kiba don ka bynta kaba khraw ha ka jingai jingnang jingstad bad ki akor ia ki khun jong ngi. Katkum ka jingngeit tynrai jong ki briew ka India, ngi pyniaryngkat kyrdan ia ki nonghikai bad u Blei.
Ha kane ka por jong ka khlam COVID-19, ka rukom ai jinghikai ki nonghikai ruh ka la pher bha, ki nonghikai ki la pdiang ia ki jingeh kiba mih na ka jingwanrah ia ka rukom ai jinghikai online. Ki la shim ia ki sienjam ban pynthikna ba ki khynnah kin ym duh ia ka jingioh jinghikai.
Ha kane ka kynti, to ngin pynsngew ia ka jingsngewnguh jong ngi sha ki nonghikai kiba la noh synniang bha sha ki kam kiba iadei bad ka jingwanrah ia ka India kaba khlain bad kaba riewspah”.
