Ai kyrshan ka AJYWO ia ka JHADC halor ka jingpynkhreh ia ka JSCL Bill, 2018

Jowai, Risaw 25: Ka Alll Jaintia Youth Welfare Organisation Central Body, ka iaroh ia ka JHADC hapoh ka jingialam jong u Ma Madonbai Rymbai, CEM halor ka jingpynkhreh bad don jingthmu ban wanrah ia ka Jaintia Hills Autonomous District (Jaintia Social Custom of Line-age) Bill-2018 ha kane ka Dorbar Tlang jong ka JHADC na ka bynta ka jingmyntoi jong ka Jaidbynriew.

“Ngim kwah ban long kum ka Tripura, ha kaba ki trai ri trai muluk hangtei ki la kylla rit paid ha la ka ri lajong. Kumta, kawei na ki lad ban iada ia ka jaidbynriew rit paid jong ka Ri Lum Jaintia ka long ka jingdonkam ia ka JHADC ban thaw  ia ka aiñ kaba don iktiar bad don bniat ban teh lakam ia ka jaidbynriew na ka jingshong kha khleh bad kiwei ki ki jingteh lakam khnang ba ka jaidbynriew kan ym shah tyllep hadien ha bud” ong u Bah M H Dkhar, President jong ka AJYWO Central Body.

U tei u nongialam jong ka AJYWO u la ong shuh shuh “ Ha ka jingshisha ia kaba kum kane ka aiñ la dei ban thaw noh naduh ki phew-phew snem ba la dep kat kum ka bor kaba ka Riti Synshar ka Ri India ka la pynkup ia ka JHADC lyngba ka Khyrnit Ba Hynriew, hynrei mynta ka por lah ban ong kumba ka la dier palat namar ka jingbym shim khia jong ki nongialam ba mynshuwa jong ka JHADC. Hynrei wat la katta ruh ka AJYWO ka pdiang sngewbha mynta ia kane ka sien jam ba donkam bha jong ka EC ba mynta ka JHADC  naka bynta ka iap ka im jong ka Jaidbynriew rit pait jong ngi”.

“Ka por ka la dei ia ka jaidbynriew rit pad jong ngi ban kyndit bynriew noh ban shim ia ka jingbakhlieh naduh na lade marwei shimet, haduh ka long iing long sem, ka long shnong long thaw, ka imlang ka sahlang bad ki bor sorkar naduh ka JHADC haduh ka Jylla ban pyndon kam la ka iktiar ban thaw ia ka ia ki aiñ lynti ban iada la ka jong ka jaidbynriew ba lah don lypa ha ka jingma mynta na ka jingshah tyllep hano re hano” la bynrap biang u Bah M H Dkhar.

U kyrwoh na ka AJYWO  u la ong ruh ba ka seng, ka kwah ba ka JHADC, kan da pynkhreh ia ka JSCLB ha ka rukom kaba janai bha da kaba peit bniah na baroh ki phang kiba donkam khnang ba kan long shishah ka aiñ kaba don iktiar bad bniat bad ban pyntrei kam hok ia ka n aka bynta ban iada ia ka jaidbynriew naduh ka shong kha khleh bad ha kiwei kiwei de ki daw kiba lah ban pynjah klep ia ka jaidbynriew.

“Lada ka Ri India ka ithuh bad kheiñ kyrpang ia ka jaidbynriew jong ngi da kaba pynhap kyrpang ia ka ha ka Khyrnit Ba Hynriew bad lyngba katei ka khyrnit, ka Riti Synshar jong ka Ri India ka la ai bor ruh ia ka JHADC ban thaw ia la ki jong ki aiñ  ha ki ba bun ki bynta kynthup ha ka ban iada kyrpang ia la ka jong ka jaidbynriew bad ka riti dustur, ngi kum ka jaitbynriew pat, balei ngi leh lyndet ia ka  iap ka iap ka im jong ka jaidbynriew lade?” ong shuh u Bah M H Dkhar.

Ka Seng, ka kyntu ruh  ia ka JHADC ba ka dei ban pyni paidbah shuwa ia katei ka Bill khnang ba baroh ki paidbah kin ioh ban ai jingmut na ka bynta ban pynlong ia katei ka Bill kaba janai bad kaba lah shisha ban iada ia ka jaidbynriew jong ngi” la pynkut u kyrwoh na ka AJYWO.

 

 

 

What Next?

Recent Articles

Leave a Reply

Submit Comment

*