Shillong, Lber 26: Ki nongshong shnong ka shnong Dira kaba hap hapoh ka hima Sohiong mynta ka sngi kila wan ai da ka jingthoh sha u CEM jong ka KHADC u bah Titosstarwell Chyne bad sha u EM ba dei peit ia ki kam Elaka u bah Jambor War halor ka jingpynkhein u Lyngdoh Sohiong ia ki Dustur ka shnong Dira.
Ha dien ba la dep ban ai ia ki jingthoh u bah Distar Jana haba kren ha ki lat pathai khubor ba ki jingthoh kiba la ai mynta sha ka KHADC ka long ban dawa na ki bor jong ka District Council ban pynbeit ia ki jingeh hapoh ka shnong Dira ia kaba u Lyngdoh u la pynkhein ia ki kyndon pyniaid shnong.
Ka jingpynkhein jong u Lyngdoh ka hima Sohiong, ka long ba u la thung sordar hapoh ka shnong Dira ia u bah Bonifast Jarain u bym dei na ka jaid jana lane u ba shong kha ha ka kur Jana, katkum ka dulir jong u shnong 1854 ka long ban long sordar ha shnong Dira dei ban long na ka jaid Jana lane u ba shnong kha ha ka Jaid jana.
Katkum ki dustur hapoh ka shnong Dira ka long ba ia u sordar la jeid da ka dorbar shnong, hynrei ha kane ka kynti kaba mynta u Lyngdoh ka Hima Sohiong u khlem khot ia ka dorbar bad la kynnoh ba la shuthung sop sop khlem ka jingtip ki paidbah ka shnong.
Dei halor kine ki nongrim ba kum ki paidbah nongshong shnong ki wan mynta ka sngi sha KHADC ban dawa ba ka KHADC ka dei ban pynbeit ia kane ka jingeh hapoh ka 15 sngi lada kam lan pynbiang ia ka riti ka dustur jong ka shnong kin wan ban kiew biang sha KHADC ban dawa ia ka hok jong ki.
