Shillong, Jymmang 08: Mynta ka sngi ka party People’s Democratic Front (PDF) kila ai ka shithi sha u Lamphang ka iing dorbar thaw ain ka jylla u Thomas A Sangma ban pyntip ba kila pyniasoh bad ka party National people’s Party (NPP).
Ia ka shithi la ai da u President ka party u bah Gavin M Mylliem MLA bad la don lang u bah Banteidor Lyngdoh MLA, ha ka jingiadon lang u Commissioner Secretary u bah Andrew Saimos, da kane ka jingai ia kane ka shith la pyndep ia ka jingpyniasoh ki MLA ka PDF sha ka party NPP.
Da kane ka jingpyniasoh kitei ki arngut ki MLA sha ka NPP mynta ka PDF kala jah kyrteng na ka jingdon ki seng sain pyrthei hapoh ka iing dorbar thawain ka jylla, kiba sha mynta ki long ka NPP, UDP, BJP, HSPDP, VPP bad ki dkhot shimet.
Ka jingdon ki MLA jong ka NPP ha ka iing dorbar kaba 60 ngut mynta kala kiew sha ka 28 ngut, 26 ngut kiba la jop ia ka elekshon na ka tiket jong ka party bad 2 ngut ki MLA ka PDF kila pyniasoh bad ka NPP.
