Shillong,Nailar 23: Ki paidbah jong ka shnong Mawlai Mawkynroh mynta ka sngi ha ka por 1 baje mynsngi ki la ioh ban kem ia uwei u briew u ba kila suba ba dei u nongtuh uba la tip kyrteng kum u Joseph Nongspung ba sah ha Lyngkyrding katba u dang thmu ban tuh ia ka umphniang tin na kawei ka dukan ka FE Enterprise .
Kat kum ka jingiathuh da ki paidbah jong ka katei ka shnong ki don bun bha ki nongtuh kiba ju iaid swait shuwa ba kin leit prong ia ki iing ki sem,ki kali ne ki dukan.
Ki la iathuh, ki nongtuh kiba la swait lupa ia kino ki jaka shuwa ba kin tuh ki la tip lupa ia ka jingdon ki don ne jingbym don briew bad ka shnong Mawlai Mawkynroh ka dei ka shnong kaba dang kham duna ki iing bad kynjah ha ka por mynsngi ka dei na kane ka daw ba ki nongtuh barabor ki ju pyrshang swait tuh na ki iing ne ki dukan.
Haba ai jingkren sha ki nongthoh khubor u Bah Forwell Warjri, u trai dukan ka FE Enterprise ula iathuh,ka dei ha ka por mynsngi ba kynjah briew ba u Joseph ula rung beit ha ka kudam buh marbam khlem jingtieng ban shim ia ka umphniang bam la ka dei makna ha ka por mynsngi ruh.
Ula ong,ka dei hadien ka jingtohkit na ka khun ba khlem die ia ka umphniang ba nga sa sngewthuh ba u dei u nongtuh kumta ha ka jingpyrshang ban bat ula lait phet pynban hynrei ka dei da ka jingiarap ki samla shnong ki sa ioh bat ia utei u briew.
Ki samla hadien ka jingtohkit ula phla ba ula leh ia ka kam ryngkat bad ki paralok kiba kular ia u ban sa wan shaw da ka kali ynda la dep ka kam.
Hadien katei ka jingjia ki samla ki la pyntip sha u Rangbah shnong ka Mawlai Mawkynroh u Bah L Nongkhlaw bad sha ki pulit Mawlai kiba la wan shim noh ban leh kat kum ka ain.
