New Delhi, Jylliew 28: Ka Myntri ba dei peit ia ka tnad korbar ri, ka Sushma Swaraj ka la plie ia ka scheme ba thymmai ha kaba ki nongaplai ki lah ban aplai passport na kano kano ka jaka ha ka ri India ha ka jingialang jong ka Sixth Passport Seva Divas kaba la long dangshen ha ka jingiadon lang u myntri khynnah ka sorkar pdeng u Manoj Sinha ba dei peit ia ki kam phah khubor bad u myntri khynnah ba dei peit ia ka tnad korbar ri u General Dr. V. K. Singh.
Da ka jingplie ia kane ka scheme ba thymmai, ki nongaplai mynta ki lah ban jied ia ka Regional Passport Office (RPO) bad ka Passport Seva Kendra (PSK) ka Post Office Passport Seva Kendra (POPSK) kaba ki kwah hapoh ka RPO ban phah ia ki aplikeshon jong ki watla ka jaka shong jaka sah jong ki mynta katkum ba la kdew ha ka phom ka hap hapoh u pud u sam jong ka PRO lane em. Kumjuh ruh ka jingpynshisha na ki pulit, lada donkam na ka bynta ka passport, yn leh ha ka jaka sah ba la kdew ha ka aplikeshon phom. Ia ka passport yn shon bad phah da ka RPO sha ki jaka ba la kdew ha ka aplikeshon da u nongaplai.
Kum ka nuksa, u briew uba dei trai shnong na Jaipur, hynrei uba sah shipor ha Kolkata, mynta u lah ban aplai passport ha PSK/POPSK hapoh RPO, Kolkata, bad um donkam ban leit shaduh sha Jaipur ban pynpoi ia ka aplikeshon na ka bynta ka passport ha PSK/POPSK hapoh RPO, Jaipur. Ka jingpynshisha na ki pulit, lada donkam yn pynlong ha jaipur. Ka RPO, Kolkata, kan shon bad phah ia ka passport sha ka jaka sah ba u la ai ha ka aplikeshon phom.
Kane ka jingsdang jong ka Ministry of External Affairs la khmih lynti ba kan ai jingmyntoi ia ki nongaplai passport ki bym lah ban aplai ia la ki passport ha PSK/POPSK kiba don hajan ki jaka sah jong ki. La kyrpad ia ki nongaplai passport ban plie ia ka Passport Portal ha ka website www.passportIndia.gov.in na ka bynta ki jingtip ba kham bniah ha kaba iadei bad kane ka scheme ba thymmai.
