Shillong, Kyllalyngkot 31
: Ka Central Youth Front kaba dei ka shnat treikam jong ki Khun Samla bala pynkha da ka seng saiñ pyrthei ba thymmai – ka Peoples Democratic Front (PDF) mynta ka sngi ka 30 tarik, Kyllalyngkot 2018 ha ka por 8:30 mynstep kum shibynta ban sdang ia ka jingialap Election ha ka rukom kaba kham pher kala pynlong da ka ‘Motor Bike Rally’ sha ki 24 tylli ki Constituency bapher bapher jong ka Ri-lum Khasi ia kaba la sdang na Office treikam jong ka Party kaba don ha Nongrim Hills jong ka Nongbah Shillong.
Ha kane ka jing ñiah thuk thuk la wan ban ia shimbynta shitrhem da ki phew tylli ki Bikes lyngba ki khun samla na kylleng ka Bri u Hynniewtrep kiba la pyniasoh ialade bad ka seng saiñ pyrthei Peoples Democratic Front (PDF), ha shwa ban sdang ia katei ka ‘Motor Bike Rally’ la ioh shwa da ka jingduwai kaba kyrpang na u President jong ka PDF u Bah Ivanlum Marbaniang bad pynbud pat da ka jingkren lyngkot na u Chairman ka Party Bah Pynshngaiñ.N.Syiem hashwa ba un kaweh ia ka lama kum ka dak jong ka jingsdang ha ka jing iaid lynti ban ialap Election da ki Khun samla ha ryngkat ka jing ia donlang jong u bah Emlang Lytan, Working President PDF, U Samla Auspicious L Mawphlang, General Secretary PDF, Bah James Sylliang kyrtong jong ka PDF na Mawhati Constituency lem bad kiwei kiwei de ki Nongialam bad ki Dkhot ba shitrhem jong ka PDF.
Haba ai jingkren lyngkot ha katei ka sngi na ka liang jong u Bah Pynshngaiñ.N.Syiem, Chairman ka Party u la ong ba kane ka Motor Bike Rally kan long haduh saw sngi kynthih kata naduh ka 30 tarik, Kyllalyngkot haduh ka 2 tarik u Rymphang 2018, ha kaba ka PDF Youth Front kan rung ha manla ki Constituency ba ka party ka pynieng kyrtong na ka bynta ban ïalap elekshon bad ban pynsngewthuh sha ki paid Nongthep Vote halor ki Nongrim, ki thong bad ki jingthmu ba ka PDF ka don ban wanrah sha u paidbah ha u 2018.
Shuh shuh na ka liang jong u Bah Pynshngaiñ.N.Syiem u la ong ruh ba ka jingmih shakhmat jong ki Khun samla ban ia kit lang ia ka lyngkor ha ka sainhima sima ka long ba ki don shisha ia ka mynsiem jong ka jing shitrhem hapoh jong ki da ka jing angnud ban wanrah ia ki jingkylla bad ia kane la sakhi lyngba ki kyntien phira kiba la thoh ha ki Banner: “MYNTA NE LANO PAT” “IF NOT NOW: WHEN” kiba long ruh ki kyntien shongsbai kiba iai kyrsoi lyngba ka thwei pyrkhat jong ki Khun Samla Central Youth Front.
Kumban shu pynkynmaw hangne ha ka sngi ba nyngkong kata ha ka 30 tarik, Kyllalyngkot ki samla kin mih ryngkat ki thuk thup ban ïaid ïalap elekshon hapoh ki 8 tylli ki Constituency bad kine ki dei ka Nongthymmai, Pynthorumkhrah, Mawlai, Umroi, Mawhati, Umsning, Nongpoh bad Jirang.
Ha ka sngi ba-ar kata ha ka 31 tarik, Kyllalyngkot kine ki samla kin rung sa ha Mairang, Mawthadraishan, Rambrai, Mawthengkut, Nongstoiñ bad Mawkyrwat. Ha ka sngi ba-lai kata ha ka 1 tarik u Rymphang kin rung ha Ranikor, Mawsynram, Sohiong, Mawphlang bad Pynursla ha ka sngi kaba saw kaba dei ruh ka sngi kaba khatduh kata ha ka 2 tarik u Rymphang kin rung ha Shella, Sohra, Mawkynrew, Nongkrem, Mawryngkneng bad yn pynkut ha Nongbah Shillong.
