Shillong, Naiwieng 28: Ki nongrep soh niamtra jong ka jylla Meghalaya mynta ki kynduh jingeh namar ba ki dieng soh katba nangmih ki sngi ki sdang ban stem ki sla bad ki iaptram noh ha kapor ba kila sdang ban sohpah, kane kala long ha jan baroh ki bynta jong ka jylla Meghalaya.
Katkum ka jingiathuh jong ki nongrep ka long ba kane ka stem ki sla jong u Soh Niamtra ka long ha dien na ki dieng soh kila sdang ban sohpah bad ha u dieng ka don ka jingbam khniang kaba ki nongrep ki shem jingeh ban pynduh bad ha dien ba la stem ki sla ki dieng soh Niamtra ki iapnoh.
Ki nongrep ki shem jingeh shibun ban sngewthuh ia kane ka jingiap ki dieng soh bad na ka liang ka tnad rep ruh kam lah ban pynshai kaei kadaw ba ki dieng soh ki iap, na ka liang ki nongrep kila bud dien ia ki jingbthah ban tah shuh ia u tynrai dieng hynrei kane kam iarap bad katba dang mih ki sngi ka jingiap tram ki dieng sah kala dang jur.
Kumba ka long mynta ka jylla Meghalaya kaba dei kawei na ki jylla ba pynmih bha ia u soh niamtra hynrei mynta kala dang hiar katba dang mih ki sngi, ka thain Sohra, thain Pynursla , thain Mawsynram, thain Mawkyrwat, thain Nongjrong bad ki bynta ba shatei jong ka jylla kila dang hiar katba dang mih ki sngi ka daw ka long na ka jingiaptram ki dieng soh niamtra.
