Shillong, Risaw 13: U Bah Kimfa Marbaniang, MLA jong ka Rambrai u la ong ba ki 575 ngut ki briew na ka shnong Huhuapara kiba la shah beh khthong ha ki pulit Assam namar ka jingshna ia ka surok MNREGS haduh mynta la shibnai lynter kim pat nud ban leit phai iing namar ki dang tieng ia ka jingthwet jong ki pulit Assam.
Haba kren ha u SP News Agency, u MLA jong katei ka thain u Bah Kimfa u la ong ba ka long kaei kaei kaba sngewsih ban iohi ba ka sorkar Meghalaya kam shym la shim khia ban ia kren bad ka sorkar Assam ban ai ka jingpynthikna ba ym dei ban pynthud ia ki paidbah kiba don ha khappud. Kine ki briew haduh mynta kim nud ban leit phai sha iing namar ki dang tieng ia ki pulit Assam.
Na ka liang jong u kum u MLA jong katei ka jaka u la ia kren bad u myntri rangbah ka jylla u Conrad K Sangma, ia u Myntri kam poh iing u James K Sangma bad kum juh ia u Chief Secretary ba ki dei ban ia kren noh bad ka sorkar Assam ba kine ki briew kin ioh ban leit phai sha iing hynrei na ka liang jong ka sorkar kala shim tieng ia kane ka kam, la kynnoh u MLA ka Rambrai.
Kine ki 575 ngut haduh mynta kim pat nud ban leit sha la ki iing ki sem jong ki ki dang shah haMalongkona bad kum u MLA jong kane ka jaka u hap ban ai bam ia ki ryngkat ka jingianoh syniang lang ki briew kane ka shnong, na ka liang jong ki bor jong ka District Adminstration ki ai bam tang shisngi bad haduh mynta kim shym phah shuh ka bam na ka bynta jong ki.
Na ka liang jong u MLA ka Rambrai u la dawa na ka sorkar ba ka dei ban ia kren noh mardor bad ka sorkar Assam ban wanrah ia ka jingshong suk ha kane ka jaka khnang ba ki briew kin ioh ban leit phai noh sha la ki jong ki iing ki sem.
