Jowai, Iaiong 20: Ka AJYWO Central Body halor ka jingioh ujor na ki katto katne ki nongsiew bill light ha kawei ka shnong ha East Jaintia Hills, ba ki hap siew tam ia ka dor bill light sa T.100/- nalor ka bill light ba lah shon da ka kor komputer, mynta ka sngi, hapoh ka jingialam u Bah M H Dkhar President bad u Bah J.R Siangshai Vice President jong ka seng, ki la leit sha ka ophis jong ka MeECL, Khliehriat Revenue Sub-Division, Khliehriat ban pan jingshai halor katei ka jinghap siew tam ia ka bill light.
“Halor ka jingud jong ki katto katne ki ki long iing halor ka jinghap siew tam sa T.100/- ia ka bill light jong ki sha ki nongkhrong bill light, nalor ka bill ba la shon lypa da ka kor komputer, ngi la pan jingshai mynta ka sngi na ka MeECL, Khliehriat Revenue Sub-Division, Khliehriat, bad ngi la lap ba kam shym la don ka jingbthah na ka liang jong katei ka ophis ia ki Franchisee ban leh kumta bad ka katei ja ophis ka la ong ruh ba kam don jingbah khlieh halor katei ka T.100/- kaba mih tam na ka bill light ba la shon da ka komputer na ophis.” Ong u kyrwoh na u Bah J.R Siangshai Vice President jong ka AJYWO Central Body.
“Ka long kaba lyngngoh ban lap ba ha ka bill light ha kawei na ki shnong ha East Jaintia Hills la shuh thoh da u khulom sa T.100/- ha ka bill light ba la shon da ka komputer na ophis bad sa kheinlang ia kane bad ka bill light, bad da kane ki nongsiew bill light, ki la hap siew tam sa T.100/- ia ka bill light jong ki nalor kaba la shon lypa da ka komputer. Kane ka jingleh jong ki nongshim kabu ha ka kyrteng jong ka bill light ka dei ka kam kaba beaiñ bad ruh ka la ktah shi katdei eh ia ki kup shiliang sem shilliang namar na ka T.100/- ki dang ioh ban thied khaw na ka bynta ki khun”, ong u Bah M H Dkhar, President jong ka AJYWO Central Body ha u kyrwoh.
U Bah Dkhar u la ong ruh, “Ha ka jingshisha ka MeECL, ka leh ia ka Electricity Franchise ha kine ki snem ba la dep ym tang ban wanrah ia ka jingpoi beit poi ryntih ka bill light hynrei ban pynsuk ruh ia u paidbah bapli khamtam ia u kup shillaing sem shilliang, hynrei I mat ki don pat ki nongkhrong bill light ki ba la shim kabu na kane bad ban khia pynban ia u kup shiliang sem shilliang kyndoi ja kpoh ba pli bad ia kane ka seng kam lah ban pdiang da lei lei ruh em.”
“Ka seng ka maham jur ba ki nongkhrong bill light (Franchisees) ba kim dei ban iaid palat ia u pud ba ka MeECL ka la pynkup ia ki kat kum ka Electricity Francise bad lada dang lap nangne sha khmat ka seng kam banse ban aiti ia ki sha ki bor jong ka aiñ ban leh ia kaba donkam. Ka seng ka kyntu ruh ia ki nongsiew bill light ba kin pyntip sha ka seng lada ki dang hap siew tam ia katei ka T.100/- nalor ka bill light ba paka (Original) khnang ba ka seng, kan ioh leh ia kaba donkam.” ong biang u Bah J.R Siangshai.
Ha u kyrwoh ba la phah da kitei ki arngut ki nongialam, jong ka seng, ka AJYWO, ka la ong ruh ba kan nang iaid bud dien shuh ia katei ka bill light ba mih tam T.100/- nalor kaba la shon da ka komputer bad seng kan sa leh ia kaba donkam.
