Shillong, Jymmang 26: Ka Khasi Students’ Union, lyngba ka Education Cell, mynta ka sngi ka lah leit iakynduh ia u Secretary ka Education Department jong ka Sorkar Jylla, u Shri Ambrose Ch Marak, IAS, ha kaba la aiti ruh ia ka dorkhas halor ki mat kiba kyrkieh ba ki samla pule ki iakynduh.
Kawei na ki mat ba ka KSU ka long nalor ka jing pyrkhing ia ka rukom ai application forms ha PGT College ha kaba bun spah ngut kiba kwah ban rung ha kane ka jaka pule ka pynlong noh ia ki ban duh lad noh ban leit namar ba kim ioh satia iaka application form.
Lah sakhi ruh, ba ka jingieng ban ap laiñ na ka bynta ban ioh application forms ka sdang naduh ki por 12baje shiteng synñia haduh mynstep da lah plie ophis. Bun na kiba ap ruh kim ioh form satia, Kane ka lah pynlong ia ka Seng ban dawa da kaba pynkiew biang ia ka number jong ki application forms na ka 500 tylli la kumno kumno 1000 tylli, bad ruh ban pynjlan biang ia ka tarik thep form.
Na ka liang u Shri Ambrose Ch Marak, u lah kular ban shim khia bad ha khmat ki dkhot ka Seng hi u lah phone wut wut sha i Principal jong ka PGT COLLEGE ha kaba u lah bthah ba dei ban pynkiew biang ia ki number jong ki application forms bad ka Seng hi ka ngeit skhem ba ka College ruh Kan leh ia kaba bha tam.
Kumjuh ruh ha ka jingiakynduh pat bad i Principal jong katei ka College, na ka liang ka Seng ka lah ai jingmut ia katei ka College ban leh noh da ka Online mode ha kaba iadei bad ka Admission procedure bad na ka liang ka College ka shim ba kane ka jingai jingmut ka long kaba dei, bad ngeit skhem ba ha Snem ban wan, ngin sa sakhi ia kane.
Ha kaba iadei bad ki Centres na ka bynta jong kito kiba hap ban thoh iaka CUET, ka Seng ka lah dawa ban pynthikna ba ki samla Khasi ki dei ban ngat beit ha Shillong. Kum ban shu pynkynmaw, halor kane ka juh ka mat, Ka Seng ka lah dep ban dawa naduh ka Snem ba lah dep ban pynthikna ba ki centres jong kito ki samla Khasi kiba thoh ia ka CUET kin hap ban dei beit hapoh Jylla bad ka sorkar kan leh ia kaba don kam.
Kaba sngewlyngngoh pat ka long, ba mynta u Snem ruh dang bun bah ki samla Khasi ba hap thoh ia kane ka exam ki hap ban leit shaduh sha bar Jylla, te kumta hapdeng ka jingiakynduh bad u Secretary jong ka Education Department, u lah kubur ba ia kito kiba dang hap leh ia kane ka exam ha kine ki taiew ban wan, kin sa hap ban thoh noh ha Shillong.
Ka mat ba khatduh ba ka Seng ka lah dawa ka long halor ka jingiatyngkhuh ki tarik thoh exams jong ka D.El.Ed bad ka B.Ed ki ban sa long ha ka 10th/06/2023, na ka liang u Secretary Department, u Shri Ambrose Ch Marak, u lah kubur ba yn sa pynkynriah noh bad ia iakane, yn sa pynbna paitbah ha ki sngi ban wan. Iathuh ka kyrwoh na Education Secretary KSU u samla Pynkmenlang Sanmiet.
