Mawphlang, Lber 18: Ka Khasi Hills Autonomous District Council haka por ba u Bah Pynshngianlang Syiem u long u Chief Executive Member u la saindur ban don ia ka jaka kyrpang ban buh pynsah nam ia ka jinglong tynrai jong ki Hima Khasi kiba hap hapoh jong ka jingpeit jong ka KHADC.
Halor kane ka jingpyrkhat kala mih ka “Khasi Heritage Village” ha jan ka law kyntang ha Mawphlang. Ia kane ka jaka la ai sngewbha da ka Hima Mawphlang sha ka KHADC ban buh pynsah nam ia ki hima khasi ha katei ka jaka.
Naduh ba sdang kala don ka jingiakren hapdeng ka Hima Mawphlang bad ka KHADC ba kan don ka jingiabhah ia ka jingmih na kaba khrong na ki nongleit jngohkai pyrthei sha katei ka “Khasi Heritage Village” hapdeng ka Hima bad ka KHADC.
Ha kane ka jingiamynjur hapdeng ka Hima bad ka KHADC ban ia bhah ia ka jingmih na kaba khrong na ki nongwan jngohkai sha katei ka jaka, kam shym don kata ka jingia mynjur katno ka Hima ka dei bad ioh bad katno ka KHADC ka dei ban bad mynta kane ka jingiakhnih bhah kala pynsateng ha kaba ym pat lah ban shim ia karai bad kane kala pynjot thiaw ia katei ka jaka kaba la pynlut da ki klur tyngka ban pynwandur ia ka.
Haba u SP News Agency u la leit ban peit ia kane ka “Khasi Heritage Village” ka long kaba isangsot ban peit namar ba kiba san mynta dei sa tang ki lynti iaid bad ki jingtei da ki dewbilat hynrei ki iing kiba la shna kyrpang katkum ka jingdon ki hima kila jot lut baroh.
Kane ka jaka mynta kam shym la long katkum ka jingthmu ban buh ia kita ki jingpynsah nam ia ki Hima khasi ba ki briew na kylleng ka pyrthei ki lah ban iohi, ia ka dustur jong ki khasi. Ka jingbym don ba peit ba sumar ia kane ka jaka la ka dei na ka Hima Mawphlang ne na ka KHADC kala wanrah ia ka jingjot ia kane ka jaka kaba kyrpang tam.
