Jowai, Iaiong 02: Ka seng FKJGP jong ka Bataw bad u Dr Sanky Shangpung MDC jong katei ka jaka kila leit ban ia kynduh ia u Deputy Commissioner jong ka East Jiantia Hills District u bah FM Dopth ban pyntip sha u ba ki don ki kali kiba iaid lyngba ka surok Rymbai Bataw Borkhat Jalalpur (RBBJ)Road ha ka por shiteng miet.
Ha kane ka jingleit ia kynduh na ka liang jong ka FKJGP bad u MDC katei ka jaka kila dawa na u DC ba dei ban pyntrei kam ia ka Lad-Lakadong Dacoity Camp khnang ba ha kum kane ka por ba don kane ka jingpakhang ban ia leh pyrshah ia u COVID-19 kumba la pynbna da u Myntri Rangbah duh jong ka Ri India bad kum juh u myntri rangbah ka jylla u Conrad K Sangma.
Ha kane ka jingiakynduh la pynsngew sha u DC ba baroh ki shnong kila kohnguh ia ka jingbthah jong ka sorkar pdeng bad kum juh jong ka sorkar jylla ba ki paidbah kim dei ban ia mih ha kine ki sngi ba la pynbna ia ka jingpakhang, hynrei lada ki kali ki iaid ha ka por shiteng synia kan buh ia ka jingeh ia ki paidbah katei ka thain kiba don kumba 30 shnong ei ei.
Ia ka Lad-Lakadong Dacoity Camp la buh ha u bani Jymmang jong u snem 2016 bad na ka liang jong ka seng ka kwah ba ka sorkar ka dei ban pyntrei kam pura ia kane ka ktem jong ki pulit ha katei ka jaka khnang ba ki kali kin nym ioh lad ban iaid ha ka por miet, lada ym lah ban leh ia kane kane ka jingpakhang ka sorkar kan long leh noh ei.
Kane ka surok ka dei kaba pyniasoh bad ki shnong kiba ia khap bad ka Bangladesh, kum ka seng bad u MDC kane ka jaka ki don ka jingsngewsyier ba ioh ki wan rung ki khar Bangladesh sha kane ka jylla lyngba ka tei ka surok dei halor kane ka nongrim ba ka seng ka dawa ba dei ban pyntrei kam ia ka Lad-Lakadong Dacoity Camp.Halor kane ka seng kala pyntip ruh sha u myntri ka sorkar jylla u bah Kyrmen Shylla ba dei ruh u MLA jong katei ka jaka.
Ha kane ka jingiakynduh na ka liang jong u DC ka East Jiantia Hills u la pynsngew sha ki nongialam ka FKJGP bad kum juh sha u MDC ba un sa ia kren ia kane ka kam bad u Superintendent jong ki Pulit jong ka District ban leh ia kaba don kam.
U Dr Sanky MDC jong kane ka jaka u la ong ba ka sorkar ka dei ban shim khia iakane ka kam ban pyntrei kam pura ia katei ka ktem jong ki pulit ban khanglad ia ka jingiaid ki kali ha ka por miet ha katei ka surok. Namar ka don ka jingsngewsyier ba ioh ban rung ki briew kiba na bar ri lyngba katei ka surok.
