Shillong, Nailur 29: Na ka daw jong ka jingkiew dor jong u piat ha kiiew ki hat ha baroh kawei ka Ri India, mynta ka sngi ka sorkar pdeng kala bthah ia baroh ki sorkar jylla ban peit ba ki nongkhaii kim dei ban buhrieh ia u pait ha ki kudam jong ki bad ba kin leit ban khynra ia ki kudam jong ki nongkhaii kane ka long katkum ka hukum kaba la pynmih mynta ka sngi.
Ban khang ia ka jingkiew dor, ka sorkar pdeng mynta ka sngi kala pynmih ia ka hukum bala khang ban shallan ia u piat sha kiwei ki ri jong ka pyrthei naduh mynta ka sngi haduh ban da pynmih da kawei pat ka jingpynbna na ka sorkar.
Ka sorkar pdeng mynta ka sngi kala phah ia ki jingpyntip sha baroh ki sorkar jylla ba kin leit ban khyndang ia ki kudam jong ki nongkhaii ban peit ba kan nym don kno kano ka jingbuhrieh ia u piat.
Ha ka juh ka por ka sorkar pdeng mynta ka sngi kala buh da ki kyndon ia ki nongkhaii ba lah ban buh ia u piat ha ki kudam jong ki, ia ki nongkhaii ban die khutai la shah ban buh ia u piat tang 100 kwintal bad ia ki nongdie lang la shah ban buh tang 500 kwintal, kane kan trei kam naduh mynta ka sngi.
Ha ka juh ka por ka sorkar pdeng kala aibor ruh ia ki sorkar jylla ba kin buh kyndon la ka jong ka jong ha ki jylla jong ki ia ki nongkhaii haduh katno ki lah ban buh ia u piat ha ki kudam jong ki na ka bynta ki nongdie khutia bad ia ki nongdie lang.
Ka jingshim jong ka sorkar pdeng ia kane ka sien jam ha kane ka kynti kaba mynta ka long ban khanglad ia ka jingkiew dor jong u piat ha ki iew ki hat hapoh jong ka Ri India baroh kawei.
Ka sorkar pdeng kala pynmih ia ka hukum ruh ba lada lap iano aino kiba buhrieh ia u piat ha ki kudam bad wanrah ia ka jingkiewdor ha iew ha hat, ym pynshitom ia kiba pynkhein ia ki kyndon bala buh da ka sorkar pdeng.
