Shillong,Nohprah 05: Ka KSU South West Khasi Hills District lyngba Ka kyrwoh na u Samla Pauldeep Tongwah, Secretary Employment and Development Cell ka pynrem jur iaka jingleh jong u M.M Dango , PWD Minister bad MLA jongka Ranikor Constituency ban shim kabu politics iaki Scheme ba la bei pisa Lyngba Ka sorkar kmie da kaba leit plie maw nongrim tang na bynta ban pynbiej paitbah na bynta Ka election.
Kane ka jingshim kabu Ka la paw tyngkrein lyngba ka jingleit plie iaka Surok Rangthong, Rangjadong, Ngunraw Roads , Wahkaji to Mawphanrang Roads , Wahkaji, Phlangdiloin, Nongmluh Kiba ha ka jingshisha Ki dei Ki scheme ba wan naka sorkar kmie hynrei la shu leit kam nongkynti da Ka jingthmu ban pynbiej paitbah tang na bynta Ka election.
Kum Ka Seng ngi pynpaw iaka jinglyngngoh ba kumno Ki scheme ba la bei tyngka da Ka NABARD kum ka Rural Infrastructure Development Fund(RIDF), Ki scheme ba la bei tyngka daka Asian Development Bank, Ki scheme naka sorkar kmie kum ka Border Area Development Programme, Special Plan Assistance bad PMGSY une u MLA u nud ban leit plie da lade hi .
Kiba kum kine Ki dei Ki kam biej bad Kiba dei ba yn pynrem jur namar Ki ialam bakla ia u paitbah jongka dong Ka thain. Ngim kwah ban iaktait namar Ka seng kam don bynta bad Ka kam politics hynrei ngim lah ban shu sngapjar ban iohi ba Ka don Ka jingpyrshang ban pynsngewthuh bakla ia u kup shiliang sem shiliang da kaba leit plie mawnongrim iaki bynta ki bym dei ki jongu.
Shuh shuh Ka seng Ka pynkynmaw ba halor ka jongioh surok rong na Rangthong sha Rangjadong Ka dei Lyngba Ka jingiakhih jongki paitbah katei Ka thain naduh u snem 2013 da kaba pynlong iaka jingmaramot hi da u paitbah iaka surok, Ka jingpynlong iaka jingialang paitbah ha Rangjadong bad ruh ka jingshimkhia jong u PWD Minister ha katei Ka por u Ma Sniawbhalang Dhar.
Ka seng Ka dawa jur na Ki officers Department ban bud ryntih iaki kyndon da kaba ym dei ban ailad iano iano ban pynbiej paitbah da kaba plie mawnongrim iaki Central Scheme kibym dei Ki bynta jong uno uno u nongmihkhmat. U Dango kum u MLA lada u kwah ban pyni paitbah iaka jingtreikam jong u ha jingshisha u la dei ban da lum paitbah ha kaban sam iaki MLA Schemes kum Ka Special Rural Work Programme(SRWP) ba hato ki ba ioh jingiarap na Kane ban maramot iaki longing ba dang sator ki dei ki ba dei hok ne em ban ioh kum kita ki Low Cost House.
Ha jingshisha kum u MLA ula dei ban pyni paitbah kumno u pyntreikam ia kiwei pat ki scheme jong u kum Ka Construction of Rural Roads Programme( CRRP) , Intensive Arts and Cultural Development Programme(IACDP), Intensive Sports and Youth Development Programme(ISYDP) , Chief Minister Special Rural Development Fund bad kiwei pat.
Shuh Ka seng Ka pynrem jur iaka jingbym don iktiar jong u Superintendent Engineer PWD Nongstoin da kaba u ailad iaki contractors ba dei Ki briew jong une u MLA ka Ranikor ban nang pyntrei iaka surok ba dang sah bym pat siang rong jongka surok Rangthong – Ngunraw Roads haba ia Ka tender dang pyllait paitbah ha Ka 22.11.2017 bad Ka tarik ba dang ailad ban thep tender kam pat kut. Kane Ka pyni ba Ka don Ka jingleh politics ba shyrkhei wat ia Ka kam contractors ruh Lyngba Ka jingailad jongki officers bad ka jingpyndonkam bakla iaka bor da u MLA bad PWD Minister kata u M.M Dango. Ka seng ka pynrem jur ia Kiba kum kine Ki jingleh Ki ba long thik kum Ka jingiuhroit ia Ka hok jong kiwei pat ki contractors.
Haba phai sha Ka Wahkaji PHC pat une u MLA jongka Ranikor u khlem leheiei hynrei u shu shim iaka nam Lyngba Ka jingshimkhia jongka Health Department. Ha u snem 2015 Kane Ka PHC Ka dang hap hapoh ka jingpyniaid jong Ka UCIL bad dei tad ynda la leit tynruh shait shait daki paitbah katei Ka thain ia u Director Ka Health bad ruh iaki Health Ministers ba Ka Health Department ka sa shimti hi noh iaka PHC naka UCIL bad sa iohlad ban plie noh ha u bnai ba lah dep.
Ka Seng Ka pynrem jur ba Ka daw jongka jingsuki ban pyntrei iaka surok 25 klur jongka KHADC ruh Ka dei halor Ka jing bymler kam jong u MLA Ranikor kum u PWD Minister hynrei lada jin ba une u Minister u shimkhia iaka roi Ka par jongka thain Umdohlun, Wahkaji bad Phlangdiloin naduh mynno ia Kane Ka Pisa na Ka KHADC la dei ban pyntrei. Ka paw tyngkrein ba une u MLA u donkti ha Ka ban iasylla iaka spah klur Ka Pisa ban ioh shna Two Lane ha katei Ka thain bad tang ban ioh tih ia u mar pohkhyndew u ba dei u uranium.
Lada une u MLA u sngewkhia shisha ia Ki paitbah Ka thain Kumba u leit ud bad kam ha Phlangdiloin u dei ban pynthikna ba Ka surok 25 klur jongka KHADC dei ban ioh pyntreikam hashwa ban kut u bnai Rymphang jong u snem ban wan.Kane Ka dei Ka kyrwoh na u Samla Pauldeep Tongwah, Secretary, Employment and Development Cell KSU South West Khasi Hills District.
