Shillogn, Jymmang 26: Ka daw bah ba ngi dawa jylla la ka jong kata ka Khasi-Jaintia State kadei namar ba ngi la iohi lypa ia ki jingeh ki ba mih ym tang haba iadei bad ka bhah thungkam lane ka Reservation Policy. Ia kane la ong da president ka seng sain pyrthei ka Hills State People’s Democratic Party (HSPDP) u bah K.P Pangniang.
“Lada u paidbah u pdiang ne um pdiang ruh, ngi hap ban iaid shaphrang ia kane ka jingdawa” Haba kren sha ki lad pathai khubor u bah Pangniang u la kam ba lada ka urlong ka jingdawa jylla la ka jong kum ka Khasi-Jaintia State bad Garoland, ka jingia bhah kam ruh kan nym don shuh namar ka bhah 80% ruh ka lah ban dei tang ki Khasi-Jaintia.
U bah Pangniang u la ong “Lada ngi ka jingdawa Khasi-Jaintia Satte bad Garoland ka urlong, ka jingiakren katno Percent ia ki paralok Garo bad katno Percent iaki Khasi kam don shuh namar la wan da kawei pat ka Ratio jong Reservation”
U bah Pangniang ula ong ki don shibun ki jingdawa kum ka jingithuh ia ka ktien Khasi haka khyrnit ba phra ka riti synshar ka ri India (Eight Schedule) kala shu sahkut namar wat ki jaitbynriew Garo ruh ki dawa ban ithuh ia ka ktieng Garo.
Hadien ba HSPDP ka la sdang ban buddien ia ki jingdawa la iohi ba ha ki 38 tylli ki ba dawa ban ithuh ia ka ktien hapoh ka Home Ministry bad hangne la lap ka ktien Khasi ka la dei lypa kawei kaba hakhmat duh.
“Hynrei hangne haba ngi don 2 tylli ki jaitbynriew, ngi hap ban dawa ban iohi lang ka jingithuh ktien Khasi bad ktien Garo bad kane ka long ka maw jynthut, nga lah ban ong” ula ong.
U bah Pangniang u la kam ba ka jingdawa ia la ka jong ka jylla kan dei ka lynti ban pynbeit ia bun bah ki jingeh kiba don ha kane ka jylla ba ia shong khleh lang ki 2 tylli ki jaitbynriew.
