Shillong, Nailar 22: Ka Jing niewbein palat ka sorkar ia ki nongkyndong ka buh ia ka jingim jong ki paidbah ha ka jingma. Ha ka jingleit jurip jong ki dkhot ka KSU Saphai Unit ia ki Ilektrik Post ba don ha shilynter Jong ka Shnong Saphai, ka la lap ba da ki phew tylli ilektrik post kiba la jan dkut naduh trai na ka daw ka jingsarang bad jinglehklet na ki bor sorkar (MEECL) ba peit ia kane ka kam. Kane ka buh ia ka jingim ki paidbah ha ka jingma namar kito ki ilektrik post ki don hajan iing briew/skul/lynti iaid kjat bad ka lah ban don ka jingduh bording ruh.
Da ka mynsiem ba sngewkhia bad don jingkitkhlieh ia ka shnong ka thaw/thain , ka KSU Saphai Unit ha ka jingialam u Samla Balawan Suchiang(President) bad u samla Ricky Syntem (Genl. Secy) ka la leit ban ia kynduh ia I Bah R.Rymbai U SDO badei peit iaki ILEKTRIK post sha kane ka thain haka 18/08/2017 ha Sub division khliehriat(MEECL) ryngkat da ka buh ia ka jingthoh. Ha kane ka jingiakynduh , Ki nongialam ka KSU Saphai Unit ki la ioh ban pynsngew ia ki jingeh bad na ka liang jong u SDO ruh u la kular ban shimkhia halor kane kloi kloi khlem dashim por.
“Ka MEeCL ka dei ban shimkhia khamkloi iakane ka kam shwa ba kan don kano kano ka jingjia basngewsih hapoh ka Shnong”, la bynrap da u samla Ricky Syntem .Ha kawei pat ka bynta ba don ka jingkiew palat ka bai bording (electricity bill), ka Seng ka la wanrah sakhi ruh ia ka jingleh thurmur ka MEeCL haka shna Bill bording lyngba ka jingujor ba la ioh na ki paidbah ba pyni ia ka sakhi ba ka bai light kala kiew sha ba palat. Ka don ruh ka jingujor halor ka jingkiew palat ka bai bording khlem da ioh jingpynshai ba biang na ki nongsam bill.
“Kane ka jingleh ka MEeCL ka pynbitar ia u paidbah bad ia ka Seng ruh imat ka sorkar kala niew riewspah palat iangi ki nongkyndong ban iaki nongsor. Ka jingpynkiew bai bording ka long palat ka MEeCL ba Ki paidbah kim lah shuh ban siew khamtam sa ka jingbymbiang ka rukom ai bording ruh. Ki nongialam ka seng ki pynpaw ruh halor ka jingbymbiang ki Lineman ruh ban tem ia ka jingthut khah khah jong ka bording. Kumta ka seng ka buh ruh ka jingkyrpad ia ka Power department bad Ministar ba peit ia kane ka kam jong ka sorkar jylla ban phai khmat sha kane ka thain jong ngi”, Balawan Suchiang (President Laskein Circle).
Shuh shuh ka Seng ka don jingkyrmen ba kane ka jingiakynduh ia ki heh MEeCL Khliehriat kan seisoh lyngba ka jingsngap ia ka jong ki ia ka jingeh u paidbah baduk batoi khnang ba kan long kaba imsuk imsain hapoh ka bri u hynniewtrep. kane kadei ka kyrwoh na u samla Balawan Suchiang u President ka Seng.