Shillong, Nailar 02: Ka seng All Khasi Hills A.Chick Federation (AKHAF) kala ia kynduh ia u myntri rangbah ka jylla u Conrad K Sangma ha kila ai ia ka dorkhas ban pynpaw ha u ia ka jingsniew jong ki surok sha kathain Ranikor sha duh Maheskhola kiba hap hapoh jong ka West Khasi hills bad South West Khasi Hills District.
Ha kane ka jingiakynduh kila ia kren ruh ia ka surok khappud kaba na Balat sha Maheskhola kaba la sniew sha ba palat
Ha kane ka jingiakynduh la kyntu ruh ia u myntri rangbah ka jylla ban buh ia ka Police Out post ha Maheshkhola, naka liang jong ka AKHAF kala pynsngew ba ka long kaba don kam na ka bynta ka jingshngiang jong katei ka jaka.
Haba ia dei bad ki lad phah khubor la ong ba ki paidbah nongshong shnong jong katei ka thain ki dang hap ban shaniah ha ka phone jong ka Bangladesh, na ka liang jong ka seng ka kyntu ia ka sorkar ba dei ban pynkhlain ia ka rukom phah khubor ha katei ka thain.
Na ka liang jong ka seng kala kdew ruh ha kaba ia dei bad ka koit ka khiah ha kaba ka thain baroh kawei ka don tang ka CHC hapoh shnong Khonjoy ha kaba kane ka jaka sumar jong ka sorkar ka dang don shibun ki jingduna bad kum juh ia ka CHC kaba don ha Ranikor.
Ha kane ka jingiakynduh kila ia kren ruh ha kaba ia dei bad ki jaka pule kiba don ha katei ka thain, ha kaba bun na ki skul kila jot la pei bad ki iing skul kila jaw umha ka por slap. Na ka liang jong ka seng kala kyntu ia u myntri rangbah ban shim khia lem ban peit ia katei ka thai.
