Shillong, Lber 15: U Bah Ebanroy Mynsong lem bad sawphew ar ngut kiwei pat na ka shnong Mawiapbang kaba hap hapoh jong ka East Khasi Hills District, kila ujor pyrshah ia u Branch Manager jong ka Meghalaya Rural Bank bad ia u rangbah shnong katei ka shnong.
Kine ki briew kila ujor ruh ia ka kong Timilda Pyngrope namar ba dei lyngba jong ka ba la ong ia ki ba kin plie account hapoh kane ka Bank bad ba kin ioh ia ka jingiarap kaba kyrpang ia kaba la tip kum ka Special Grant Assistance na ka skhim jong u myntri rangbah duh jong ka Ri.
Ha kane ka jingujor la ong ba haduh mynta kim shym la ioh ia kata ka jingiarap na ka skhim jong u myntri rangbah duh jong ka Ri, hynrei kaba kyndit ka long ba kila ioh jingtip ba la don ha ki account jong ki ba la thep da mano re mano, ki don kiba la thep T. 2,50,000/- bad don kiba la thep T. 1,50,000/- khlem ka jingtip jong ki trai.
