Shillong, Nailar 22: U Bah Hamletson Dohling myntri ba dei peit ia ki kam pynroi sor mynta ka sngi u la leit ban jurip da lade sa shsien ia ka jaka bret nuit ha Marten kaba don ha Mawlai Mawiong, ryngkat ki ophis jong ka sorkar jylla.
Haba kren ha ki lad pathai khubor ha kane ka jaka u myntri u la ong ba ka jingwan jong u ka long ban wan peit da lade ia ka jingtrei ia ka kynroh kaba ha syndah jong ka lynti rim naka bynta ban pyndep kloi ia kane ka jingker kynroh.
U myntri u la ong ba ha dien ba la dep ia kane ka jingker kynroh ia kaba la tip kum ka “Land Fild” ia une u nuit ba rim ba la lum ha kane ka jaka yn sa thep ha kine ki thiew bad ym tap noh da ka khyndew bad kane kan iarap 50% ban pynduna ia ka jingsma.
La iathuh ba ia ka jingtrei na ka bynta ban pynkylla sboh ia ka jaboh kala dang iaid sha khmat bad ki don ki mashim kiba la poi ha kaba la pyndait ia ki bad kin dang don shuh kiba dang wan poi. Ia u nuit ba wan theh thymmai ynsa pyndon kam ha kane ka jaka tylliat nuit bad kane ka ruh ka iada na ka jingsma.
Ia ka jingpynhap ia u nuit ia mynta ym pat lah ban leh namar ba shibynta na ka kynroh kaba la shna kala khyllem bad ia kane ka jingtrei ruh kin sa sdang noh ban shna ia ka. Na ka liang jong u myntri u la ong ba haba kut jong mynta u snem un lah ban pynduna ia kane ka jingsma da kaba synreit dawai.
Ha kane ka jingleit ia u myntri la synran lang da u principal secretary u bah DP Wahlang, Director ka tnad pynroi sor u bah E Kharmalki bad u CEO jong ka Shillong Muncipal u Bah B S Sohlya.
