Shillong 19 Jylliew: Mynta ka sngi, u Bah AL Hek myntri jong ka sokar jylla u ba dei ruh u MLA jong ka Pynthorumkhrah u la leit ban ia kynduh ia u Executive Member ka KHADC u bah Paul Lyngdoh ha KHADC halor ka jingshah khang bad shah tah laha ki 33 tylli ki dukan bar jylla ha ka thaiñ Nongmensong
Halor kane ka jingshah khang tala jong ki 33 tylli ki dukan kiba hap hapoh ka Konstitwensi ka jong u namar kim don ki kot ki sla ne ki syrnot khaïi na ka KHADC katkum ki kyndon ha kane ka jingiakynduh na ka liang jong u Bah Hek u la kyntu ia u EM ba dei peit ia ka khaii pateng ba lada ai ia kiwei dei ban ai lang na ka bynta kito ki bar jylla kiba dei hok shisha ki nongshong shnong.
U Bah Hek u la kyntu ia u EM ka KHADC ba u dei ban ailad biang ia kine ki dukan ba kin plie biang ha dien ba kila pynbiang ia ki kot ki sla katkum ka jingdon kam kiba ka KHADC kala buh.
Haba kren ha lo lad pathai khubor u Bah Hek u la ong “Lada ailad ia kiwei, dei ban ai lang ia kiwei ruh kiba dei hok ki nongshong shnong ka jylla, watla kim dei ki riewlum”, la ong u bah Hek.
U Bah Hek u la iathuh ba ha kane ka jingiakren bad u Bah Paul, na ka liang jong u EM ba dei peit ia ka khaii pateng hapoh jong ka KHADC ula kular ban bishar ia ki kot ki sla jong kito ki briew ba shah khang dukan hapoh shi taiew ban peit ia kaei kaba lah ban leh.
La ong shuh shuh ba “Ki don ki dukan kiba khang ki don kiba plie, ki don kiba don laisen ki don ki bym don laisen, nga ong ia u EM, ba lada ka KHADC ka ai laisen ia uwei u briew ha kano kano ka jaka, dei ban ai lang’.
La ong biang, “Lada phi ai ia u A ha kawei ka jaka, phim ai ia u B ha kawei ka jaka, kane kam long bad baroh dei ban ai ia kito ki bar jylla kiba dei hok ki nongshong shnong ha kane ka jylla kiba la sah la shong slem bah kiba don ki kot ki sla ba biang”, la ong u bah Hek.
U bah Hek u la ong ba lada ai, dei ban ai lut ia kiwei kiba donkam trading license bad lada ym ai ruh, dei ban nym ai ia baroh, ym dei ban leh shiliang.
