Jowai, Iaiong 09: Ka Hynniewtrep Youth Council War Jaiñtia Circle hadien ba la ud ki paidpah ka thaiñ naka ji
ngkiew dor palat pud ki marbam mardih kumta ka seng ka la ujor pyrshah sha ka sorkar MDA iakiba pynkiew dor iaki marbam mardih kaba ktah shikatdei eh ia u kup shiliang sem shiliang ba duk ba kyrduh.
Ha katei ka jingujor la phah ban tohkit bniah ban lap iaka daw tynrai naki stock ba mih ki marbam khnang bakito kiba nud ban shim kabu hakum kane ka por ba wan ka nem sniew kin ngat haka jingpynshitom ba tyngeh ki bor jong ka aiñ.
Mynta ka sngi ka Hynniewtrep Youth Council Amlarem unit hapoh ka jingialam u President u Samla Dilast Shylla lem bad u Vice President Samla Monlang Nyalang la leit ban ujor sha u DC West Jaiñtia Hills ban leh ia kaba donkam kat kum ki kyndon jong ka aiñ khnang ban lah ban rat dyngkhong iaki khwan myntoi shimet kiba nud ban thombor iaka hok long rynieng u kup shiliang sem shiliang hakum kane ka por ba mat iaka nemsniew.
Ka seng ka kyntu jur iaki bor badei peit ban bthah ia baroh ki dukan ban tah kum ki kynja notice hakhmat dukan iaki dor ki marbam mardih ne kiwei pat ki tiar ki tar ba donkam man la ka sngi bad kumjuh ruh ki trai dukan kidei ban ai cash memo ia ki paidpah kiba leit thied jingthied na dukan bad lada ki trai dukan kim lah ban ai cash memo ka seng ka dawa jur naka sorkar jylla ba ka dei ban khang khyrdep iakito ki dukan ki bym kohnguh iaka aiñ khnang bakan long kum ka jingsneng iaki wei pat.
Katba u Samla Dilast bad u Monlang ki dang wanphai na office u DC West Jaiñtia Hills bad ha shiteng lynti ki la ioh ban iaphylliew jingmut bad ki Volunteers ka shnong Shken Pyrsit kum ka dak ban iasnohkti lang ban kit ban bah ia ka khia ka shon ka imlang sahlang khamtam hakum kane ka por ba wan ka nemsniew naka khlam COVID-19.
Haka juh ka por Ka HYC Amlarem unit hapoh ka jingialam u General Secretary ka Amlarem unit u ba long ruh u Sport Secretary ka Circle u Samla Bonanza lem bad ki dkhot ka seng mynta ka sngi kum shi bynta ban ialeh pyrshah iaka khlam Covid-19 la leit ban synreit dawai ha kylleng ki bynta ka shnong Amlarem.
