Shillong, Jylliew 23: Bun na ki paidbah, khamtam ha kane ka nongbah Shillong kila buh ka jingkylli, ba balei ka sorkar kam shym la sam shuh ia u shini rashon lyngba ki dukan “Fair Price Shop dealer” ia kiba la juh tip kum ki dukan sam rashon, kane ka jingkylli la kylli da bun ki paidbah khamtam ha kane ka nongbah Shillong.
Haba u SP News Agency u la ia kren bad bun ki riew paidbah na kylleng ban kylli kumno ki sngew haba mynta la bun bnai ki khlem ioh ia u shini rashon na ki dukan sam khaw rashon, ki ba bun kila pynsngew ba kum ki riew paidbah kin nym lah ban leh ei ei lada ki ioh ki shu shim bad lada kim ioh ruh ki hap ban shu sngap.
Bun na kiba u SP News Agency u la ia kren, kim kwah ban pynpaw kyrteng, hynrei kila iathuh ba wat la ka shini rashon ka shnong dor T.30 tyngka shikilo ban ia nujor bad ka shini kaba ki thied na niew ka dang shong tad shibun namar mynta ka shino na iew ka shnong dor T.45 tyngka shikilo.
La iathuh ruh haba ki leit ban shim ia u khaw rashon man u bnai na ki dukan rashon haba ki kylli na ki nongsam khaw lano yn ioh shini, ka jubab kaba ki ioh ka long ymtip, ynda la ai na ophis kin sa sam, kane ka dei ka jubab kaba ki paidbah ba don ia ki kard rashon kila pynsngew.
