Balei ka Sorkar Meghalaya kam shna aiñ ban mang kam 80% ha ki Private Sector, da u bah Wyraiwan Sohtun, Jt. Secy, HNYM

Ka seng Hynñiewtrep National Youth Movement (HNYF) ka iawer ia phi ban ia don bynta lang ha ka jing dawa jong ka seng na ka bynta ban pynbor ia ka Sorkar ban thaw ia ki aiñ ki kanun ban buh kyrpang ia ki kam ki jam ha ki Private Sector kumba 80% na ka 100% ia ki khun samla ka Bri u Hynniewtrep
Ki bynta ba pynlong ia ka Seng ban dawa ia ki aiñ ki kanun ban buh bhah kyrpang ia ki kam ki jam ha ki Private Sector ka dei namar ba ki kam ki jam ha ki tnad Sorkar ki la jan dap lut, kumba ka juk hi ka iaid ha salonsar ka pyrthei ngi iohi ba dei tang ki Kompeni hi kiba lah ban thawlad bad ban saiñ dur kumno ban iohkam iohjam ki khynnah samla ka ri.

Ngi ju iohi barabor ba ka Sorkar ka kren bad ka pynpaw sha ki khun samla ka Bri u Hynñiewtrep ba kan wanrah ia ki kompeni bapher bapher sha kane ka jylla jong ngi na ka bynta ban iohkam iohjam ki samla ka ri, hynrei haduh mynta hi ka Sorkar ka lah ban wanrah tang khyndiat eh kita ki kompeni sha ka jylla Meghalaya.

Haba ngi phai pat khyndiat sha ki katto katne tylli ki kompeni bad kharkhana kiba la seng kam ha kane ka jylla Meghalaya, ngi shem ba ka jingiohkam iohjam ba bun hi ka leit sha ki bar jylla, ym sha ki trai ri trai muluk.  Wat tang 5% ruh ki samla ka ri kim don kiba iohkam iohjam ha kine ki kompeni bad kharkhana.  Ka jing kylli ba mih ka long ba balei ka leit jia kumne? Hato dei tang ka kamram jong ki sengbhalang ban peit ia kine? Shaei jah ki nongshna aiñ lane kita ki MLA, kiba ki paidbah ki la jied, ban shna aiñ bad ban iada ia ka hok ka jong ki?
To ngin ia phai khyndiat shaphang kiei kita ki Private Sector.   Ki Private sector ki dei, kino kino ki kompeni ki bym dei jong ka Sorkar lane ki bym pyniaid da ka Sorkar hynrei ki kompeni kiba long trai da u riewshimet lane ki kynhun jong ki riewshimet kiba ialum lang ban treikam kum ka kynhun ia kajuh ka kam bad ha kajuh ka kyrteng.
1. Shi bynta lada ngi ia kren ia ki kam ki jam ha ki Banking Sector lane ki Private Banks kum ka HDFC, AXIS, INDUSIND Banks bad kiwei kiwei ngi shem ba ki rukom them kam thep jam ha kitei ki Kompeni la shu tip sopsop tang da ki katto katne bad ka jingthep kam hi ruh ka dei beit da ka jingpyniaid da ki ophisar jong kitei ki Bank na shabar.
2. Ha kiwei kiwei pat ki Sector kum ki Private Educational Institute la shu thung kam tang naba ki don ka jingiadei bad ki nongpyniaid jong kitei ki Institute khlem da don kino kino ki jingpynbna ha ki lad pathai khubor khnang ba baroh kin ia tip lang.
3. Ka Tourism Sector ka dei kawei na ki lad pyniohkam iohjam ia ki khynnah samla bad ngi da iohi shisha ba bun na ki samla jong ngi ki la tbit bha ban trei ha kine ki kam. Ka Meghalaya hi ruh ia mynta hi,ka la dei kawei na ki Top Destination ha ka laiñ jngohkai pyrthei ha ka ri India.

Hynrei wat hangne ruh ngi iohi ba bun na ki samla ka ri ki hap ban leit trei shabar jong ka Jylla namarba ka Sorkar kam lah ban khring lane ban wanrah ia ki Kompeni ban shna ia ki Five Star Hotel, ki Amusement Park ba kiwei kiwei khnang ban shna lad shna lynti ban iohkam iohjam ki samla ka ri.

Lada ngi kren shaphang ki Five Star Hotel ngam lah khlem da buh jingkylli ia ka Sorkar,  ba balei haduh mynta ym lah shuh ban pyndep ia ka Crowborough Hotel?  Lada ka jingkitkhlieh jong ka Sorkar ka long tang kumne, kan kham bha ia ki Politishian jong ngi ba kin ym pynmih shuh ia ki kyntien, “Ki samla ki dei ki lawei jong ka jaidbynriew.”

Phi ki Politishian phi ladei ban sngewlehraiñ ban kren ia kajuh shi kajuh tang na ka bynta ba phin ioh iakhring Vote.   Haba phai sha ki Hotel rit kiba don ha kylleng ka jylla la iohi ba ki nongpyniaid bad ki nongtrei kiba bun dei hi ki bar jylla.  Ka jingkylli kaba mih hangne ka long hato kita ki samla jong ngi kiba leit trei sha ki Sorbah ka ri India kim pat lah mo ban trei ha kine ki Hotel kiba don ha sor Shillong.

Balei hap mih na Jylla lajong, haba, lada ka Sorkar ka shimkhia ban shna ia ki aiñ ki kanun ban buh kyrpang ia ki kam ki jam ia ki samla ka ri, ngin jin da pahuh ban jied ia ki kam kiba ngi donsap ban trei.
4. Ki Manufacturing Industries kiba kynthup ia ki Steel and Alloy Factories, Sawmills, Plywood, Cement bad kiwei kiwei, ki don ka bynta kaba khraw bad ki lad ki lynti kiba bun na ka bynta ban aikam aijam ia ki samla ka Bri u Hynñiewtrep.
Na ka liang ka HNYM ngi la ju kynduh barabor ia kine ki longheh jong kine ki Kompeni bad ngi la ju iakren barabor ba ki dei beit ban thungkam ia ki trai jylla, hynrei ka jubab kaba ngi ioh ka long beit ba ki la thung ia ki trai shnong bad kita ki trai shnong ki dei tang na ka shnong ba don kita ki Manufacturing Plant (Factory) ki jong ki.

Hato lada ka Factory ka don ha Byrnihat lane Lumshnong ki samla na Shillong ne Nongstoiñ kim lah seh ban iohkam iohjam ha kine ki Factory.  Ka jubab kaba ar kaba ngi ju ioh, ka long ba ki samla jong ngi kim lah ban trei ia ka kam bad ki long kiba jaituh.

Ha baroh ki jaidbynriew don beit uba smat bad ba jaituh, ym baroh u samla Khasi u ba jaituh.  Kine ki daw dei tang ki daw kai, ka jingshisha ka dei beit ba kine ki kompeni ki kwah ban aikam tang ia ki briew ki jong ki hi ym ia ki samla jong ngi.
5. Kiei ki kam ba ki samla jong ngi ki lah ban trei ha kine ki Factory.  Ki kompnei haba ki seng ia ki Factory ki donkam shibun ki jingkyrshan na kiwei pat ki bynta treikam. Kawei na ki kam ba ki samla jong ngi ki lah ban treikam ka dei ha ka bynta jong ka Logistic lane Transportation.

Kino kino ki samla kiba don jingthmu ban trei ki lah ban iashim bynta ha katei ka kam.  Ki Factory ki donkam ia u mawshun ha ki Karkhana pynmih dewbilar, ki dieng ha ki Sawmill bad Plywood Factory ki Scrap lane ki tiar jot ha ki Alloy and Steel Factory.  Ki don shibun ki mar ha ka jylla jong ngi ba ki samla ki lah ban iabuh da ki kali lajong ban trei ia kine ki jaitkam.
6. Ki kam Contract bad Sub-contract ha kaba ia dei bad ka suplai ia ki mar ki mata sha kine ki Factory.
7. Ki kam ki jam ia ki khynnah samla kiba la dep ia ki jingpule ki jong ki la ka dei ha ki liang Administrative ne ha ki Technical Line katkum ki kyrdan bad ki jingtbit ba ki la ioh.  Ka Sorkar ka la pynlut da ki hajar klur ka pisa paidbah ban wanrah ia ki kam pynroi sha ka jylla jong ngi khamtam ha kaba iadei bad ki kharkhana ban iohkam iohjam ki samla ka ri.

Ka Sorkar ka ladep ai Subsidy bad khusnam (incentives) ia kine ki kompeni ha ki liang bapher kum ka Transport Subsidy, Power Subsidy bad kiwei kiwei. Nga ngeit skhem ba baroh ngi dang ia kynmaw ba ka Sorkar ka ai Ar (2) klur tyngka sha ka phlim Rock On II.

Ym dei ba ngi bishni ba ka Sorkar ka ai khusnam (incentives) iano iano hynrei namar ba ka dei ka pisa jong ngi u paidbah, ngi dei ban tip bad ban ioh jingkheiñ ka ei ka jingmyntoi ia ngi ki samla haba ngi ai khusnam ia ki kompeni kiba wan shane sha ka jylla ka jong ngi.
Ka Seng ka kwah ban buh jingkylli kumne sha ki samla ka Bri u Hynñiewtrep, “Hato kumno phin shim ia ka jinglong rangbah haba ki lad ki lynti ba phin ioh kam ioh jam kim plie? Kumno  phin pynurlong ia ki jingkular jong phi ia i samla baieit jong phi ban poi sha ka iathoh shong kurim kaba donburom?  Kumno phin buh ia ka bam ha ki pliang jong ki khun jong phi? Kumno phin leh haba ki lad ki khang ia phi?”  Ko ki khun samla ka Bri u Hynñiewtrep to khie naba thiah bad to shut la u khulom, la ka jabieng ban iakhun ban pynbor ia ka Sorkar ban wanrah ia ki aiñ ki kanun ban biang ki kam ki jam ia ka mynta bad ia ka lawei ka ban sa wan.
Ko, phi ki kmie ki kpa jong ki samla ka Bri u Hynñiewtrep ka jingkylli ia phi ka long, “Hato phi la ia ioh thiah suk bad phim khuslai shuh hadien ba ki khun samla jong phi ki ladep ia ki jing pule ki jong ki? Hato ki khun samla jong phi ki la ia biang kam?“ Lada ka jubab jong phi ka long ‘hooid’ ngi dang ia khuslai bad ngim pat ioh thiah, te wan iasnohkti lang bad ngi ba ngin ia pynbor ia ka Sorkar ba kan shna ia ki aiñ ki kanun ban buh kyrpang 80% na ka 100% ia ki kam ki jam ha ki Private Sector na ka bynta ki samla ka Bri u Hynñiewtep ha ka jylla Meghalaya.
Ngi pdiang burom ia ki kompeni ban bei pisa bad ban buh kharkhana ha kane ka jylla jong ngi. Ia ki kharkhana kiba la don shuwa hangne, ngi la ai ia phi ia ki marpoh khyndew jong ngi,  ka um ba thiang, ka lyer bakhuid, ka mariang ba pyngngad kiba dei ki jong ngi, hynrei kaei kaba ngi donkam na phi ka dei ka kam ka jam ia ki samla jong ka Bri u Hynñiewtrep.
Khatduh iawai, lada kiwei kiwei ki jylla kum ka Haryana, ka Maharashtra, ka Karnataka bad kiwei kiwei ki ladep buh kyrpang ia ka bhahkam bhahjam ha ki Private Sector ia ki samla ka jylla jong ki, te balei ka Sorkar Meghalaya kam lah. Hato ka dei ka jingñiewbeiñ jong ka Sorkar Meghalaya ia ki khun samla ka ri ne dei ba kim don jingkitkhlieh ia ka bha ka miat ki samla ka ri lehse ioh dei ba kim don ia ka jabieng ban pyrkhat ba ka shongsuk shongsaiñ ha ka jylla, kan wan ynda ki khun samla ki biang kam biang jam.
Kaba khatduh hi ka dei ka kamram jong ngi ki paidbah ban pynsngew ia ki skhor ba kyllut jong ka Sorkar ban ioh kheit ia u soh uba thiang na ka bynta ka mynta bad ka lashai jong ka jaidbynriew.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet