Shillong, Iaiong 04: Ki paidbah ki kylli balei ka sorkar kam shym sam shuh ia u shini rashon sha ki paidbah ka jylla lyngba ki dukan sam rashon. Kane ka jingbym ioh ia u shini rashon la long mynta la bun bun bnai.
Haba ia dei bad u shini ba la sam sha ki paidbah lyngba ki dukan khaw rashon ka sorkar pdeng kala pynsangeh noh, hynrei la shah ia ki sorkar jylla ba kin thied na ki iew paidbah bad sam sha ki paidbah ha ka sorkar kaba la buh da ka sorkar jylla.
Hapoh jong ka jylla Meghalaya ka sorkar ka la buh dor ba ia u shini rashon dei ban die sha ki paidbah ha ka dor T.30 tyngka shikilo ha kaba la song bha ha ki plastik. Ha u snem bala dep ki paidbah ki dang ioh ia u shini hynrei mynta kam shym don shuh kata ka jingsam ia u shini rashon sha ki paidbah.
Katkum ki jingtip kiba la ioh, ka sorkar kala ai jingbit ban thied shini tang naduh u bnai Iaiong haduh u bnai jylliew jong u snem 2017 bad mynta kala palat san bnai ka sorkar kam shym la thied shini shuh ban sam sha ki paidbah.
Ki lad khubor ki iathuh ba na ka liang jong ka tnad sam bam sam dih ha ka jylla kala thoh sha ka sorkar ban pan jingbit ban thied shini ban sam sha ki paidbah hynrei ka sorkar haduh mynta kam shym la ai kano kano ka jingthoh sha ka tnad sam bam sam dih la kin dang beteng ia kane ka jingthied ne kin sangeh noh, ong ki thymmei khubor.
