Balei leit rung National People Party ki mla phoilian?Da u Babu Kular Khongjirem

Ka jingtyllun ka political drama ka la itynnad bha ha Meghalaya hapoh kane ka shisnem tam mynta. Haba ia kynduh para ba eh, ka game ruh ka itynnad bha. Ka game ka long hapdeng u Chief minister na kawei ka liang bad ki MLA phoilian pat na kawei ka liang. Ha ka political game 2017, U Chief minister u la jop pyrshah ia ki MLA phoilian.

Lai tylli ki tyrnem bah (dieng tangon) ba u Chief Minister u la pyndonkam ia kine ki MLA phoilian jong u. U dieng tangon ne u tyrnem bah uba nyngkong eh ba u la khyrwit ia ki ka long ka jingshlur jong u ban pynhiar shuki Minister khlem salia shuh la kidei ha ka shuki symbud myntri Rangbah ne myntri baheh (cabinet minister). Kane ka jingnud u Chief Minister ban pynhiar kyrdan (rank) ia ki ka la pynlong ia ki MLA phoilian ba kin kulmar jingmut (nervous) hi thlim wat la ki pyrshang ban tep eit miaw ia la ka iwtung.

U tyrnem ne u dieng sympat uba ar pat dei ka jingstad jong u ban pynduh/ pyndam (dissolved) lut khoit ia ki unit Congress kiba la thaw ne thung da kine ki MLA phoilian naduh Block level haduh ki primary unit.Ym don ba ithuh shuh ia ki nongialam ne ki nongkyrshan Congress wat la U MLA jongki u dang sah ne dangneh kum u MLA Congress. Kane ruh ka la pynkulmar jingmut ym tang ia ki MLA phoilian hynrei ia baroh ki nongialam bad ki nongkyrshan party Congress. Ki nongkyrshan Congress kila sdang ban ia phet iing noh shawei la kumba phet u ngap khlem ka kyiaw ngap (MLA). Ha ka jingshisha, dei u ngap uba bud kat shaba her ka kyiaw hynrei ha ki Constituency jong ki MLA phoilian pat ka kyiaw (MLA) ka leit bud pynban nadien kat sha ba ialam u ngap.

Sa u tyrnem bad dieng tangon ba khadduh jong u Chief minister ka long ba um shah satia ia kine ki MLA Phoilian ba kin apply tiket da lei lei ruh ban ialeh na ka party Congress watla ki dang dei ki seating Congress MLA na ki Constituency jongki. Dei hangne kein ba wat lada kwah ban shong iing (congress) hynrei ka iing (Congress) pat kam shah shuh ia ki ban shong. Nalor katta, katkum ka jingkren U Ex-President ka MPCC, U bah Dr D.D Lapang kine ki MLA phet iing ym shah satia ba kin rah ne kit kino kino ki tiar ki tar ne ki tum ki tam na ka iing Congress bad la beh iing ia ki tang da ka met thylli suda. Dei hangta kein ba ki wad jaka sah kat shaba lap bad khadduh ki shem bad donbok ba ki lap ia ka iing ba la shna na Garo Hills jong u (L) P.A Sangma ha ka kyrteng ka NPP.

Kine ki MLA phoilian ki long thik kum ki myrsiang shah dain tdong jong ka kot Phawer Aesop. Ki leit pynroh bad iawer kylleng ki jaka ia ki paidbah ba lui lui (innocent voters)  ba ki sngewtynnad bad sngew pyngngad hana, ba ki la shah dain tdong bad ki kwah ban pynliat lem ia kiwei de ha kajuh ka thliew. Ka jingsneng ka ong ba ‘ngi sngew shngain shibun lada baroh baroh ki ialiat lem ha kajuh ka thliew’. Kum kine ki jait MLA kin iai leh phoilian ynda kila don sha kawei ka iing ruh (party). ‘Ynda la kyrni ka jingmlien la eh ban bthat ia u kynjri jong ka’. Kumjuh ruh, ‘ynda la mlien la myllen’.

Hynrei kaba ktah eh bad pynlyngngoh ia ki paidbah jong ki Constituency jong ki ka long ba ki shu ia ieh noh jyndat (resigned) ia ka jinglong MLA jong ki ha ha ka 29th tarik December 2017 khlem da kynjoh ktien satia ia ki paidbah kiba jied bad pynjop donburom ia ki ha ka MLA election 2013. Ki paidbah jong kine ki Constituency ki la dei ban shong khlem don MLA shuh mynta. Kiba donkam sign ia ki form ne ki kot ki sla ba donkam ban sign ne recommend U MLA ruh kim lah shuh. Kane ka jingleh mon jong kine ki MLA ban leh katba mon ka long kum ka jingniew bein bad ibein ia ki paidbah kiba la pynjop donburom ia ki ha kito ki por election. Ha ka por ba ki kwah ban jop MLA ha u snem 2013, ki wan khroh ki wan kjor da ki ktien jali-jaum khnang ba kin liat ne ngeit ki paidbah. Hynrei ynda ki mut ban iehnoh pat (resigned) ki shu phet la ka phet ne ieh jyndat la kum U lok uba pyllait san shyieng ia ka lok katba mon.

Mynta pat, kine ki juh hi ki MLA kiba la pyllait sanshyieng na ka lok lajong (Constituency lajong) kin sa wan biang ban pah, ban luh, ban khroh, ban kjor ia ka lok barim (Constituency) ba kan khot ne treh biang ban wan long kpa biang (MLA) sa shisien pat ha ka Constituency jong ki. Kum kine ki jait MLA kin long thik kum u klew uba la iehnoh jyndat ia ka sngi ba u ibang ia ka samla kper tyrso sha pyrthei bad sa babe kylla hadien khlem lah khie khlieh shuh.

Ka jingkyntu ia ki paidbah ka long ba kin long kiba ia husiar bha ia kum kine ki jait kpa (MLA) kiba leh katba mon, iaphet –iaphet, iawan-iawan ba ioh ka nangjot ka nangpra ei pynban ka iing ka sem ne ka Constituency ba ki mihkhmat na ka bynta jongki. Ki Paitbah ki dei ban ai jingsneng tyngeh ia kum kine ki jait MLA khnang ba kan long ka jinghikai ym tang na ka bynta jong ki hynrei ia kiwei pat ki ban sa long MLA hadien habud.

 

What Next?

Recent Articles

Leave a Reply

Submit Comment
*