Shillong, Naitung 04: U Deputy Commissioner jong ka East Khasi Hills District u bah PS Dkhar u la khot ia ka jingialang ban ia pynbeit ha kaba ia dei bad ka Mawlai Community Rural Development Block kaba dang sah teng ia kaba ym pat lah ban plie haduh mynta. Ia kane ka jingialang la buh ba kan long ha ka 6 tarik mynta u bnai.
Haba kren ha u SP News Agency, u Deputy Commissioner jong ka East Khasi Hills u Bah P S Dkhar haba kren ha u SP News Agency u la iathuh ba un sa phah ia ka jingpyntip sha baroh kito kiba dei ban khot ba ka jingialang kan long ha ka 6 tarik mynta u bnai ha ka por shibaje.
La iathuh ba katkum ka jingkhot, ha kane ka jingialang, ki long baroh ki MLA ki MDC ki ban hap hapoh jong kane ka Mawlai C&RD Block, ki Sengbhalang, Ka Mawlai Town Dorbar bad ki Rangbah shnong. Ka jingthmu jong ka jingkhot ia kane ka jingialang ka long ban ia pynbeit ha kaba ia dei bad ka jingbuh ia ka Mawlai C&RD Block.
Kiwei pat ki thymmei khubor ki iathuh ba na ka liang jong u myntri rangbah U Dr Mukul Sangma u kwah ban plie noh ia kane ka Mawlai C&RD Block hynrei kaba sah ka long ba haduh mynta ym pat lah ban rai ia ka jaka haei ban buh ia ka namar ka don ka jingiatan la kan long ha Mawpat, lane ha Mawtawar.
La ong ba na ka liang jong u Myntri rangbah ka jylla u la bethah ia u Deputy Commissioner jong ka East Khasi Hills ban khot ia kane ka jingialang ban ia pynbeit khnang ba ka sorkar kan lah ban plienoh ia kane ka Block kaba la sateng mynta la shisnem tam.
